Չեմպիոնների լիգան վերադառնում է

Այսօր կմենկարկի ՈւԵՖԱ-ի Չեմպիոնների լիգայի 2014/15 մրցաշրջանի «Փլեյ-օֆֆ» փուլը: 16 ակումբներ կպայքարեն` Եվրոպայի լավագույն  ակումբի կոչմանն արժանանալու համար: 

Եվրոպայի ակումբային ֆուտբոլի ամենահեղինակավոր մրցաշարի 1/8 եզրափակիչում այսօր fրանսիական ՊՍԺ-ն սեփական հարկի տակ կընդունի Լոնդոնի «Չելսի»-ին, իսկ «Շախտյոր»-ը Դոնեցկում կմրցի Մյունխենի «Բավարիա»-ի հետ:

ՊՍԺ-«Չելսի»

Ֆրանսիական ՊՍԺ-ն երկրի առաջնությունում աչքի է ընկնում անկայունությամբ: Փարիզեցիները վերջին 5 խաղերում տոնել են 3 հաղթանակ, 2 հանդիպում ավարտել ոչ-ոքի:  Հարկ է նշել, որ «Կան»-ի հետ սեփական հարկի տակ տեղի ունեցած առաջնության վերջին խաղում մինչև 89-րդ րոպեն  ՊՍԺ-ն հաղթում էր 2:0 հաշվով, սակայն մրցակիցը վերջին րոպեներին կարողացավ 2 գնդակ ուղարկել տանտերերի դարպասը:

«Չելսի»-ն Պրեմիեր լիգայի 25 տուրերից հետո վստահորեն գլխավորում է մրցաշարային աղյուսակը: Ազնվականներն ունեն 59 միավոր և 7 միավորով գերազանցում են 2-րդ տեղում ընթացող «Մանչեսթեր Սիթի»-ին: Առաջնության վերջին 5 խաղերում Մոուրինիոյի թիմը 4 հաղթանակ է տոնել և կրել 1 պարտություն:

Բուքմեյքերները հավասար են գնահատում կողմերի հնարավորությունները:  Թիմերի հաղթանակների միջին գործակիցը 2,7 է: Ոչ-ոքին ստացել է 3,1 գործակից:

«Շախտյոր»-«Բավարիա»

Ուկրաինայի առաաջնությունում դեռևս հանգիստ է: Առաջանության 14 տուրերից հետո  Դոնեցկի «Շախտյոր»-ը 31 միավորով զբաղեցնում է  2-րդ հորիզոնականը և առաջատար Կիևի «Դինամո»-ին զիջում է 5 միավորով:

 Գվարդիոլայի թիմը բարձր տրամադրությամբ է ժամանել Դոնեցկ: «Բավարիա»-ն շարունակում է վստահորեն գլխավորել Բունդեսլիգայի ընթացիկ առաջնության մրցաշարային աղյուսակը: Գերմանիայի գործող չեմպիոնը տարին սկսեց պարտությամբ (Վոլֆսբուրգ-Բավարիա 4:1), սակայն կարողացավ հետզհետե վերագտնել իր խաղը:  Երեք օր առաջ տեղի ունեցած խաղում «Բավարիա»-ն 8 անպատասխան գնդակ ուղարկեց «Համբուրգ»-ի  դարպասը:  

Բուքմեյքերներն այս խաղում բացահայտ ֆավորիտ են համարում մյունխեցիներին, որոնց հաղթանակը գնահատվում է միջինը 1,4 գործակցով: Տանտերերի հաղթանակի համար սահմանված գործակիցը 9-ն է, իսկ ոչ-ոքին ՝ 5:

 Հիշեցնենք, որ 1/8 եզրափակիչում միմյանց հետ կմրցեն նաև  «Յուվենտուս» (Իտալիա) - «Բորուսիա» (Գերմանիա), «Բազել» (Շվեյցարիա) - «Պորտու» (Պորտուգալիա),    «Բայեր» (Գերմանիա) - «Ատլետիկո» (Իսպանիա), «Շալկե-04» (Գերմանիա)-«Ռեալ» (Իսպանիա), «Արսենալ» (Անգլիա) - «Մոնակո» (Ֆրանսիա), «Մանչեսթեր Սիթի» (Անգլիա) - «Բարսելոնա» (Իսպանիա) զույգերը: