Պերմյակովի երկու փաստաբաններն իրենց գործն են անում, չպետք է նրանց նույնացնել մեղադրյալի հետ

Գյումրիում Ավետիսյանների ընտանիքի 7 անդամներին սպանելու մեջ մեղադրվող ռուս զինծառայող Վալերի Պերմյակովի պաշտպանությունն իրականացնում է երկու փաստաբան: Նրանց անունները գաղտնի են պահվում՝ անվտանգության նկատառումներով:

Yerkir.am-ն ավելի վաղ հայտնել էր, որ հայկական կողմը Պերմյակովին տրամադրել է հանրային պաշտպան: Մեզ հետ զրույցում Պերմյակովի նախկին փաստաբան Թամարա Յայլոյանն ասաց, որ նրան պաշտպան տրամադրելը ճիշտ քայլ է, հակառակ պարագայում օրենքի խախտում կարող էր լինել:

«Եթե մենք գործ ենք հարուցել, ապա իրավունք չունենք օրենքները խախտելու: Անձն իրավունք ունի պաշտպանության` անկախ նրանից, թե ինչ հանցանքի մեջ է մեղադրվում, նրան պետք է պաշտպան տրամադրվի: Ես չգիտեմ՝ ով է նա, սակայն շատ ճիշտ է, որ հանրային պաշտպան է ներգրավվել:  Ես միշտ էլ հայտարարել եմ, որ շատ ճիշտ կլինի, որ հայկական կողմը փաստաբան տրամադրի, և ցանկալի է, որ տղամարդ լինի»,- ասաց փաստաբանը:

Նա ասաց նաև, թե, իր իմանալով, Պերմյակովի շահերը պաշտպանում է նաև մեկ այլ փաստաբան՝ Ռուսաստանի Դաշնությունից: «Նա նույնպես իր մասնագիտական գործունեությունն է կատարում: Եվ երկու պաշտպանների դեպքում էլ հասարակությունը պետք է նորմալ վերաբերվի և նրանց չանձնավորի մեղադրյալի հետ, ճիշտ չէ այդպես»,- ասաց Յայլոյանը: