Պետք չէ վստահ լինել, որ կապահովեն մեր անվտանգությունը. Արթուր Գևորգյանը՝ Բաքվում կայանալիք Եվրոպական խաղերի մասին

Այսօր լրագրողների հետ հանդիպման ժամանակ Հայաստանի բռնցքամարտի ֆեդերացիայի նախագահ Արթուր Գևորգյանը հայտնեց իր կարծիքը 2015 թվականին Բաքվում կայանալիք Եվրոպական խաղերին հայ մարզիկների մասնակցության վերաբերյալ.

«Բավական բարդ է, և համարձակ որոշում է պահանջվում, որը, միևնույն ժամանակ, վտանգավոր է: Մենք գիտենք` ինչ երկրի մասին է խոսքը և վստահել, թե նրանք կապահովեն մեր անվտանգությունը, մի քիչ կասկածելի է: Միևնույն ժամանակ, մենք այդ փորձն ունենք: Այդ երկրում մասնակցել ենք Եվրոպայի առաջնության և միջազգային մրցաշարերի: Որոշումը կկայացվի, բայց, ցավոք, ունենք լավագույն մարզիկներ, որոնց ծնողները թույլ չեն տալիս իրենց երեխաներին Բաքվում մասնակցել մրցաշարերի, և դրա դեմ ոչ մի բան չենք կարող անել: Կարծում եմ, որ եթե վերջնական  որոշում ընդունվի, որ պետք  է մասնակցենք Եվրոպական խաղերին, ուրեմն մեր սպորտային ղեկավար կազմով պետք է լինենք մեր մարզիկների կողքին և քաջալերենք նրանց: Այնտեղ այնպիսի մթնոլորտ է ստեղծվում, որ շատ բարդ է  այդպիսի բարոյահոգեբանական վիճակում  փայլուն արդյունք ցույց տալ, իսկ  հավաքականում չունենք այդպիսի լիդեր, ով թքած կունենա այդ մթնոլորտի վրա և կկարողանա իրեն դրսևորել լավագույն կողմերով: Ինձ համար կարևորը միայն մասնակցությունը չէ»: