Որոշ պաշտոնների աշխատավարձերը հավասարեցվեցին

Այսօր ԱԺ արտահերթ նիստում քննարկվում էր կառավարության ներկայացրած` «Պետական պաշտոններ զբաղեցնող անձանց վարձատրության մասին» օրենքում լրացումներ և փոփոխություններ կատարելու մասին օրենքի նախագիծն առաջին ընթերցմամբ ընդունելու հարցը։

Հիմնական զեկուցող` ֆինանսների նախարարի տեղակալ Վախթանգ Միրումյանի խոսքերով՝ անհամապատասխանություն է առաջացել հարկային և մաքսային ծառայության` միևնույն մակարդակի պաշտոնների վարձատրության չափի միջև, ինչպես նաև ֆինանսների նախարարության և քննչական վարչության ու քննչական կոմիտեի համապատասխան աշխատակիցների աշխատավարձի մակարդակի միջև։

Օրինագծով առաջարկվում է հավասար մոտեցում սահմանել այս պաշտոնների համար, այսինքն՝ առաջարկվում է հավասարեցնել հարկային և մաքսային ծառայությունների` միևնույն մակարդակի պաշտոն զբաղեցնող անձանց աշխատավարձերը, որովհետև գործառութային առումով էական տարբերություններ առկա չեն։ Ինչպես նաև՝ ֆինանսների նախարարության և քննչական վարչության աշխատակիցների աշխատավարձերը համահարթեցնել քննչական կոմիտեի նույն մակարդակի պաշտոն զբաղեցնող անձանց աշխատավարձերին: