Սուպերնախարարը վերջապես խոսեց նախարարության շենքի վերանորոգման մասին

Այսօր ՀՀ ֆինանսների նախարար Գագիկ Խաչատրյանը լրագրողների հետ զրույցում վերջապես պատասխանեց yerkir.am-ի՝ ֆինանսների նախարարության շենքում իրականացվող շինարարության մասին հարցին:

Հիշեցնենք, որ արդեն տեւական ժամանակ է` Yerkir.am-ը փորձում է այս հարցի վերաբերյալ պաշտոնական պատասխան ստանալ:

Ի պատասխան մեր հարցին, թե ինչո՞ւ որոշվեց վերանորոգել ֆինանսների նախարարության շենքը, եթե նախկին նախարար Դավիթ Սարգսյանի օրոք եւս շինարարություն է իրականացվել, ինչը հաստատել է նաեւ նախարարության լրատվական ծառայությունը, եւ որքա՞ն գումար է հատկացվել այդ շինարարությանը, Գագիկ Խաչատրյանը նախ հայտարարեց, թե «շատ լավ հարց է», այնուհետեւ հավելեց. «Ֆինանսների նախարարության շենքի շինարարությունը և նման կարգի շինարարական աշխատանքները կատարվում են մեր պահուստային ֆոնդի, արտաբյուջետային միջոցների հաշվին: Մենք ունենք լավ խնայողություններ, ծախսում ենք շատ օպտիմալ և ռացիոնալ, քանի որ համակարգի առջև դրված են բավական խնդիրներ: Ֆինանսների նախարարության շենքն անհիշելի ժամանակներից չէր վերանորոգվել, և ես չեմ կարծում, որ ներկա ժամանակակից պայմաններում կարող ենք աշխատակիցներին չտրամադրել նորմալ պայմաններ»:

Հարցին, թե որքա՞ն գումար է հատկացվել այս վերանորոգմանը` ամեն օր ականատես ենք լինում, որ շինարարությանը նոր թափով է շարունակվում, Գագիկ Խաչատրյանը պատասխանեց. «Մենք աշխատանքները չենք ավարտել, վերանորոգումը կշարունակվի մինչև նորմալ աշխատանքային պայմաններ ստեղծվեն և համակարգչային տեխնիկայով հագեցվի: Այնպիսի միջոցներ պետք է ստեղծվեն, որ մարդիկ կարողանան նորմալ աշխատել»: