Հայկ Գևորգյանը սպասում է Ծառուկյանի` ցեմենտի գործարանն իրեն նվիրելու առաջարկին

ԱԺ «Իմ քայլը» խմբակցության պատգամավոր Հայկ Գևորգյանը շարունակում է պնդել, որ  2002-ին «Արարատցեմենտ» գործարանը վաճառվել է 200 հազար դոլարով: Այսօր խորհրդարանում լրագրողների հետ զրույցում նա ասաց, որ խոսքը կառավարության որոշման մասին է, որի համաձայն՝ արժեթղթերի գինը 200 հազար դոլար է:

«2002-ին գործարանն անցել է «Մուլտի գրուպին», իրականում 2002 թվականին գործարանը վաճառվել է 200 հազար դոլարով «Ռոբերտո» ընկերությանը, որը գրանցված է Բելգիայում, բայց դրա հիմնադիրը օֆշորային ընկերություն է: Թող բարի լինեն` բացահայտեն դրա իրական սեփականատերերին, ու ձեզ համար ամեն ինչ պարզ կդառնա»,- շեշտեց պատգամավորը:

Դառնալով Գագիկ Ծառուկյանի հայտարարությանը, որ գործարանը պատրաստ է նվեր տալ այն մարդուն, որը կապացուցի, որ այն գնել է 200 հազար դոլարով, Գևորգյանն ասաց. «Թող ինքը որոշի, ես սպասում եմ առաջարկներին»։