Բռնցքամարտի Եվրոպայի պատանեկան առաջնություն. հայ մարզիկներից 3-ը հաղթել են

Ռուսաստանի Անապա քաղաքում շարունակվում է 1998-1999 թվականներին ծնված պատանի բռնցքամարտիկների Եվրոպայի առաջնությունը, որին Հայաստանը մասնակցում է 12 մարզիկով:

Երեկ ռինգ դուրս եկան Հայաստանը ներկայացնող 5 մարզիկներ, որոնցից 3-ն իրենց մենամարտերն ավարտեցին հաղթանակով: Հատկապես գեղեցիկ հաղթանակ տոնեց գերծանր քաշային` գյումրեցի Գուրգեն Հովհաննիսյանը, ով փայլուն ոճով առավելության հասավ թուրք Սալահատին Կոչագուի նկատմամբ` իր համար ապահովելով առնվազն բրոնզե մեդալ:

Իր երկրորդ հաղթանակը տոնեց 75 կգ քաշային` Արթիկի մանկապատանեկան մարզադպրոցը ներկայացնող Վան Մելքումյանը, ով պարտության մատնեց վրացի Տարաս Կանդելակիին:

Իր մենամարտը հաղթանակով է ավարտել նաև 48 կգ քաշային Վահե Բադալյանը, ով ուժեղ է գտնվել Իսրայելը ներկայացնող Մալախ Ֆեդիի հետ պայքարում:

Ցավոք, 46-կգ քաշային Ժիրայր Սարգսյանը և 70 կգ քաշային Հայկ Հովհաննիսյանը պարտություն են կրել և դուրս մնացել հետագա պայքարից: Այնուհանդերձ, մեր 12 բռնցքամարտիկներից 8-ը դեռեւս շարունակում են պայքարը մեդալների համար, իսկ նրանցից մեկն արդեն իսկ ապահովել է առնվազն բրոնզե մեդալ: Այս մասին հայտնում է Հայաստանի բռնցքամարտի ֆեդերացիայի մամուլի քարտուղարությունը: