ԵՏՄ-ին Հայաստանի անդամակցությունը` երեխա ամուսնացնելու նման մի բան

Այսօր ԱԺ քննարկումների ժամանակ, երբ ներկայացվում էին գյուղնախարարությանը հատկացված գումարները, ԱԺ ԲՀԿ խմբակցության պատգամավոր Վահագն Մախսուդյանը հարց ուղղեց ֆինանսների փոխնախարար Պավել Սաֆարյանին, թե Հայաստանը անդամագրվում է ԵՏՄ-ին, այդ դեպքում գյուղմթերքի արտահանման համար ի՞նչ ծախսեր են նախատեսվում:

Պավել Սաֆարյանը պատասխանեց, որ ԵՏՄ-ին անդամակցության համաձայնագիրը դեռ պետք է հաստատվի ԱԺ-ի կողմից, ուրեմն այդ դեպքում ինչպե՞ս հնարավոր է արտացոլել այդ համաձայնագրի հետևանքները: «Իրավաբանորեն մենք չենք կարող հետևանքները արտացոլել բյուջեի ծախսային մասերում: Երբ համաձայնագիրը կհաստատվի, կկատարվեն ուսումասիրություններ, և այս կամ այն ձևով` կլինի օրենքի մեջ լրացում, թե` կառավարության որոշում, դա անպայման կարտացոլվի»,- ասաց նա:

ԲՀԿ-ական պատգամավորն արձագանքեց. «Երբ որ մի ընտանիքում երեխա պետք է ամուսնանցնեն, պահուստային ֆոնդ են նախատեսում: Դուք պահուստային ֆոնդում դա նախատեսե՞լ եք»:

Պավել Սաֆարյանը զարմացավ. «Դուք գիտե՞ք` ինչ բան է պահուստային ֆոնդը, դա ֆոնդ է չնախատեսված ծախսերի համար»:

ԲՀԿ-ական պատգամավորը իրեն չկորցրեց` ասելով. «Դե անունը ուրիշ բան դրեք»: