Գեղամյանը գիտի, թե ինչու է ձգձգվում ԵՏՄ-ին Հայաստանի անդամակցությունը

Երեկ լրագրողների հետ զրույցում ՀՀ վարչապետ Հովիկ Աբրահամյանը, պատասխանելով հարցին` հայտնի՞ է, արդյոք, թե Հայաստանը երբ է դառնալու ԵՏՄ անդամ, ասել էր, որ մինչև տարեվերջ ԵՏՄ անդամակցության հարցը հաստատ լուծում կստանա:

Հիշեցնենք, որ Սերժ Սարգսյանը Աստանայում, դիմելով ԵՏՄ հիմնադիր երկրներին, խնդրել էր հունիսի 15-ը սահմանել` որպես անդամակցության վերջնաժամկետ: Ակնհայտ է, որ ԵՏՄ-ին Հայաստանի անդամակցության հարցը ձգձգվում է:

Yerkir.am-ի հետ զրույցում ԱԺ ՀՀԿ խմբակցության պատգամավոր Արտաշես  Գեղամյանը, պատասխանելով հարցին, թե ինչո՞ւ է ձգձգվում Հայաստանի անդամակցության հարցը, ասաց.  «Ես չէի ասի, որ հետաձգում կա: Չգիտես` ինչու, մոռանում ենք, որ Հայաստանը անցյալ տարվա սեպտեմբերի 3-ից հետո կատարեց այն աշխատանքը, ինչը ԵՏՄ հիմնադիր անդամները տարիներով են արել: Տարին դեռ չի բոլորել, հիմնական հարցերի շուրջ արդեն շատ լուրջ պայմանավորվածություններ ունենք նախագահների մակարդակով, այն աստիճանի լուրջ, որ Ղազախստանի նախագահ Նուրսուլթան Նազարբաևը ասաց, որ մինչև հուլիս 1-ը կհասցնեն: Եվ եթե հիմա ձգձգվում է, ուրեմն, իմ համոզմամբ, երկու գործոնի պատճառով` որ Հայաստանը համառորեն փորձում է ամենանպաստավոր շտկումներն անել մնացած հարցերի մեջ, և պրոցեդուրային ընթացակարգերի պատճառով»:

Ըստ Գեղամյանի`  փորձագետների մակարդակով սկզբունքային նշանակության բոլոր հարցերը լուծված են Հայաստանի ու ԵՏՄ-ի միջև, մնացել են երկրորդ փուլի հարցերը, որից հետո կորոշվի անդամակցելու տեղը, օրը, և մեծ հանդիսությամբ ու արարողությամբ կստորագրվի այդ անդամակցությունը: Նրա խոսքով` հիմքեր չկան մտահոգվելու Հայաստանի անդամակցության առումով, և ինքըհավատում է Սերժ Սարգսյանի ու Վլադիմիր Պուտինի հայտարարություններին:

«Երկու օր առաջ Վլադիմիր Պուտինը, երբ հանդիպում է ունեցել  ՌԴ դիվանագիտական կորպուսի հետ, հստակ հայտարարել է, որ մոտակա ժամանակներում Հայաստանը կդառնա ԵՏՄ անդամ»,- ասաց Արտաշես Գեղամյանը: