Հրապարակվեց Շանթ Հարությունյանի եւ ընկերների գործով վճիռը. Շանթը դատապարտվեց 6 տարվա ազատազրկման

Քիչ առաջ Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը հրապարակեց նոյեմբերի 5-ի անկարգությունների գործով դատավճիռը: Այս մասին դատարանից տեղեկացնում է Yerkir.am-ի թղթակիցը:

Բոլոր ամբաստանյաներին դատարանը մեղավոր ճանաչեց: Մասնավորապես` Շանթ Հարությունյանը դատապարտվեց 6 տարվա ազատազրկման, Ավետիս Ավետիսյանը, Լիպարիտ Պետրոսյանը, Վարդան Վարդանյանը՝ 5 տարվա, Ալբերտ Մարգարյանը՝ 6 տարվա, Ալեք Պողոսյանը եւ Մկրտիչ Հովհաննիսյանը՝ 4 տարվա, Արմեն Հովհաննիսյանը՝ 2 տարվա, Հայկ Հարությունյանը ՝ 4 տարի 6 ամսվա, Սեւակ Մնացականը՝ 1 տարի 6 ամսվա, Տիգրան Պետրոսյանը՝ 1 տարվա, Վահե Մկրտչյանը՝ 7 տարվա ազատազրկման: Դատարանը վճռեց Շանթ Հարությունյանի որդուն դատապարտել 4 տարվա ազատազրկման, սակայն պատիժը պայմանականորեն չկիրառել: Իսկ Միսաք Առաքելյանի նկատմամբ 50 հազար դրամ տուգանք նշանակվեց:

Ամբաստանյալները պատիժը պետք է կրեն ՀՀ ԱՆ համապատասխան քրեակատարողական հիմնարկում:

Վճռի հրապարակումից հետո լարված իրավիճակ ստեղծվեց: Մեր թղթակիցը տեղեկացնում է, որ ներկաները վանկարկում էին «ամոթ» եւ հայհոյում:

Ամբաստանյալ Շանթ Հարությունյանի նախկին կինը` Ռուզաննա Բադալյանը, անեծքներ հնչեցրեց մեղադրող դատախազի հասցեին:

«Չես մարսելու, տակա'նք, ստո'ր, սատկես դու, դու ապրելու իրավունք ունե՞ ս»,- բղավեց նա: