Երկրպագուների միասնական երթ՝ Հայաստան-Սերբիա խաղից առաջ

Հոկտեմբերի 11-ին Եվրո-2016-ի ընտրական փուլի շրջանակներում ֆուտբոլի Հայաստանի ազգային հավաքականը «Հանրապետական» մարզադաշտում կմրցի Սերբիայի ընտրանու հետ: Այս խաղի կապակցությամբ ազգային հավաքականի «Առաջին Հայկական Ճակատ» (ՖԱՖ) ֆան ակումբը խաղից առաջ կազմակերպում է երկրպագուների միասնական երթ դեպի «Հանրապետական» մարզադաշտ: ՖԱՖ-ի ֆեյսբուքյան էջը տարածել է հաղորդագրություն, որում ասվում է.

«Անցավ ուղիղ 1 տարի երևանյան վերջին հաղթական խաղից: Հոկտեմբերի 11-ին մեզ օդ ու ջրի պես պետք է միավորներ վաստակել:

ՖԱՖ-ը, ինչպես միշտ, ազգային հավաքականի խաղից առաջ կազմակերպում է ավանդական դարձած երկրպագուների միասնական երթ դեպի մարզադաշտ:

Հայաստանի հավաքականի բոլոր երկրպագուներին /կարևոր չէ` որ տրիբունայում եք լինելու/ հրավիրում ենք հոկտեմբերի 11-ին, ժամը 17:00-ին Ֆրանսիայի հրապարակին կից` Ֆիլհարմոնիայի առջև գտնվող Արամ Խաչատրյանի հուշարձանի մոտ:

Երթը կընթանա Օպերա - Թումանյան փողոց - Հյուսիսային պողոտա - Հանրապետության հրապարակ - Վերնիսաժ - Վարդան Մամիկոնյանի արձան - Վ. Սարգսյանի անվան Հանրապետական մարզադաշտ ճանապարհով:

Բոլորին կոչ ենք անում գալ Ազգային հավաքականի մարզաշապիկներով, իսկ ով չունի` հագնել կարմիր շապիկներ մարզադաշտի տրիբունաները կարմիր ներկելու համար:

Եռագույնների, երկրպագման շարֆերի առկայությունը ցանկալի է:
Բոլոր ցանկացողները մեր օգնությամբ կներկվեն եռագույնի գույներով: Խաղի սկիզբը` 20:00-ին»: