Կամերային նվագախումբը Ֆրանսիայում և Շվեյցարիայում ներկայացրել է հայ կոմպոզիտորների գործերը

Օրեր առաջ Հայաստանի պետական կամերային նվագախումբը վերադարձել է հյուրախաղերից: Նվագախումբը, գեղարվեստական ղեկավար և գլխավոր դիրիժոր Վահան Մարտիրոսյանի ղեկավարությամբ, այս շրջագայության ընթացքում ութ համերգներով հանդես է եկել Ֆրանսիայի և Շվեյցարիայի մի շարք քաղաքներում:

Բացառապես բոլոր համերգների ծրագրում ընդգրկված են եղել հայ կոմպոզիտորների ստեղծագործություններ: Նվագախումբը համագործակցել է նաև երաժիշտներ Անաստասիա Շապովալի /ջութակ/ և Խավիեր Չաթիլոնի /թավջութակ/ հետ:

Հիշարժան է եղել սեպտեմբերի 7-ին Ժնևի՝ «Վիկտորիա» համերգասրահում կայացած համերգը: Համերգի ավարտին հնչել է Արամ Խաչատրյանի «Սուսերով պարը»` փոխադրված 4 դաշնամուրի և նվագախմբի համար, որի փոխադրումը Վահան Մարտիրոսյանը պատվիրել էր հատուկ այդ երեկոյի համար: Հանդիսատեսին հատկապես դուր է եկել այն փաստը, երբ Վահան Մարտիրոսյան դիրիժորը միաժամանակ հանդես է եկել որպես դաշնակահար` միանալով 3 դաշնակահարներին: