Մոտ 9 միլիոն դրամ` 61 այլընտրանքային աշխատանքային ծառայողներին վճարելու համար

Սեպտեմբերի 4-ի նիստի ժամանակ  կառավարության հաստատմանը կներկայացվի 2014 թվականի ամառային զորակոչի շրջանակներում այլընտրանքային աշխատանքային ծառայության ուղարկված 61 այլընտրանքային աշխատանքային ծառայողների դրամական բավարարման գումարները վճարելու նպատակով 2014 թվականի կառավարության պահուստային ֆոնդի հաշվին 9 միլիոն 150 հազար դրամ գումար հատկացնելու մասին որոշման նախագիծը:

Կառավարության  որոշմամբ ստեղծված Այլընտրանքային ծառայության հարցերով հանրապետական հանձնաժողովի որոշումներով' սույն թվականի ամառային զորակոչի շրջանակներում այլընտրանքային աշխատանքային ծառայության է ուղարկվե,լ ընդհանուր առմամբ, 61 քաղաքացի, որոնք իրենց ծառայությունն են անցնելու կառավարության որոշմամբ նախատեսված վայրերում'   դրանք, բացի Վայոց Ձորից, մնացած մարզերի մարզպետարանները, Երեւանի քաղաքապետարանն ու տարածքային կառավարման նախարարությունն են:

«Այլընտրանքային ծառայության մասին»  օրենքի 17-րդ հոդվածի 4-րդ մասի համաձայն` այլընտրանքային աշխատանքային ծառայության վայրի հեռավորությունը այլընտրանքային ծառայողի հաշվառման վայրից 30 կմ-ը գերազանցելու դեպքում այլընտրանքային աշխատանքային ծառայողին պետք է վճարվի փոխհատուցում, իսկ օրենքի     19-րդ հոդվածի 1.1. մասի համաձայն` այլընտրանքային աշխատանքային ծառայողին տրվում է ամuական դրամական բավարարում' մինչև 30000 դրամի չափով:

Հանձնաժողովի կողմից այլընտրանքային աշխատանքային ծառայության ուղարկված քաղաքացիների հաշվառման վայրերի և ծառայությունն անցնելու վայրերի միջև եղած հեռավորությունը չի գերազանցում 30 կմ-ը, հետևաբար այդ ծառայողներին կվճարվեն միայն օրենքով նախատեսված դրամական բավարարման գումարները:

Որոշման նախագծով կսահմանվի նաեւ, որ նշված մարմինները (բացառությամբ տարածքային կառավարման նախարարության) այլընտրանքային աշխատանքային ծառայողների դրամական բավարարման գումարները պետք է վճարեն այլընտրանքային աշխատանքային ծառայության վայրի կազմակերպությունների միջոցով, իսկ տարածքային կառավարման նախարարությանը տրամադրված գումարները պետք է փոխանցվեն Երևանի քաղաքապետարանին՝ Երևան քաղաքի այլընտրանքային աշխատանքային ծառայության վայրի կազմակերպությունների միջոցով ծառայողների դրամական բավարարման գումարները վճարելու համար: