Հույս չդնելով կառավարության վրա, այլ` մեր արժանապատվության վրա. Մեկնարկեց «Ի պաշտպանություն Լևոն Հայրապետյանի» երթը

Այսօր Երևանում կազմակերպվել էր երթ` ի պաշտպանություն Լևոն Հայրապետյանի: Երթին մասնակցում էին բազմաթիվ արվեստագետներ, մտավորականներ, ակտիվիստներ:Երթի մասնակիցները պետք է հայտարարություններ ու նամակներ  հանձնեն  ՄԻՊ-ին, ՀՀ-ում Ռուսաստանի դեսպանատանը, նախագահի նստավայրին և  և ՀՀ ԱԳՆ-ին: Մինչ երթի մեկնարկը մասնակիցների հետ  միասին աղոթեց Տեր-Հակոբ քահանա Խաչատրյանը: Լևոն Հայրապետյանի աջակցության շտաբի  անդամ Արմինե Սիմոնյանի փոխանցմամբ, Արկադի Տեր-Թադևոսյանը (Կոմանդոսը) հայտնել է երթին իր աջակցությունը:

Երթին մասնակցում էր երգիչ-դերասան, ՀՀ վաստակավոր արտիստ Միքայել Պողոսյանը: Նա նշեց. «Ես կարծում եմ, որ ժամանակն է, որ մենք ճանաչենք մեր մեծերին. նկատի ունեմ մեծ հայերին: Ըստ Լևոն Հայրապետյանի` սերը դա արարք է: Շատ մեծահարուստներ կան, որ էդ հարստությունն իրենցից զատես,  ոչինչ տակը չի մնա,  իսկ մենք գործ ունենք մի մտավորականի, մի մարդու հետ, ով թիկունք է կանգնել ոչ միայն Ղարաբաղին, ոչ միայն հային, այլ նաև Ռուսաստանում ապրող հայերին:

Ես գիտեմ, թե որքան  բարի գործեր է  ինքն արել: Էսօր խնդիրն այն չէ, ինչ խնդրով է նա այդ վիճակում հայտնվել, այլ խնդիրն այն է, թե մենք ինչ պետք է անենք, որ այս խնդիրը լուծենք: Մենք մեզ չենք ների, Աստված չանի, որ Լևոն Հայրապետյանի առողջությունն այդ պայմաններում վատանա: Մենք պետք է հասկանանք, թե  շուտափույթ ի՞նչ գործողություններ մենք կարող ենք անել, հույս չդնելով կառավարության վրա, այլ հույս դնելով մեր արժանապատվության վրա»:

Լևոն Հայրապետյանի եղբորորդին` Գուրգեն Հայրապետյանը նշեց. «Ինքը ֆիզիկապես իրեն լավ չի զգում, թեև  հոգեպես ինքը շատ պինդ, ուժեղ մարդ է: Ինքը 65 տարեկան է, պետք չի դա մոռանալ»: Վահան Շիրխանյանն էլ նշեց, որ երթի մասնակիցներին միավորել է մի  մարդ ով արժանի է այդ հարգանքին:

«Բարերար է էությամբ, իսկական բարերար, ոչ թե կեղծ բարերար: Հազարավոր մարդկանց օգնած և ոչ մեկի առջև պայման չդրած,  մարդ, ով  օգնել է` միայն իր ուժերի վրա հենվելով»,- ասաց Վահան Շիրխանյանը: