ՌԴ ՊՆ-ն պնդում է, որ մալայզիական ինքնաթիռի կործանման վայրը գտնվում է ուկրաինական ԶՀՀ խոցման գոտում

Մալայզիական ինքնաթիռի երթուղին եւ կործանման վայրը գտնվում են ուկրաինական հեռահար C-200 զենիթահրթիռային համալիրի 2 մարտկոցի եւ միջին հեռահարության «Բուկ-M1»-ի 3 մարտկոցի խոցման գոտում: Այս մասին ИТАР-ТАСС-ին հայտնել են ՌԴ ՊՆ մամուլի ծառայությունում՝ հավելելով, որ Կիեւի վստահեցնումները, թե հուլիսի 17-ին ուկրաինական զենիթահրթիռային համալիրներից օդային թիրախների ուղղաթյամբ կրակ չի բացվել, լուրջ կասկածների տեղիք է տալիս, քանի որ ռուսաստանյան ռադիոտեխնիկական միջոցներով գրանցել են դրանցից մեկի ռադիոտեղորոշիչ կայանի աշխատանքը:

ՌԴ ՊՆ-ն նաեւ ընդգծել է, որ հուլիսի 17-ին տվյալ տարածքում ՌԴ օդուժը եւ զինված ուժերը գործողություն չեն իրականացրել, եւ դա լիովին ապացուցվում է օբյեկտիվ հսկողության միջոցներով:

Նշենք, որ ավելի վաղ Ուկրաինայի գլխավոր դատախազ Վիտալի Յարեման հայտարարել էր, որ աշխարհազորայինները ուկրաինական զենիթահրթիռային համալիրներ չեն զավթել:

Իսկ քիչ առաջ Ուկրաինայի ազգային անվտանգության եւ պաշտպանության խորհրդի տեղեկատվական կենտրոնի պաշտոնական ներկայացուցիչ Անդրեյ Լիսենկոն պնդել է, որ մալայզիական ինքնաթիռը ուկրաինական ՀՕՊ սարքավորումների գործողության տարածքից դուրս է եղել: Բացի այդ, ըստ նրա, զնեիթահրթիռային համալիրների գույքագրումը ցույց  է տվել, որ բոլոր հրթիռները տեղում են: