Ալիևն իրեն պարծենկոտի ու կռվարարի նման պահեց. բրիտանացի պատգամավոր

Ադրբեջանի նախագահ Իլհամ Ալիևը Ստրասբուրգում ԵԽԽՎ ամառային նստաշրջանի ժամանակ իրեն պարծենկոտի ու կռվարարի նման պահեց: Այս մասին ասվում է բրիտանացի պատգամավոր Փոլ Ֆլինի հոդվածում, որը հրապարակել է Covcas bulletin պարբերականում:

Հիշեցնենք, որ բրիտանացի պատգամավորի հարցն այնքան էր հունից հանել Ալիևին, որ նա պատգամավորի վրա մատ էր թափ տվել և նրան մեղադրել ստախոսության մեջ։

Ֆլինը նշում է, որ իրեն ընդամենը 30 վայրկյան էին տվել հարցեր ուղղելու համար, և ինքը հետաքրքվել է. «Ես հանդիպել եմ բլոգերների ու լրագրողների, որոնց Ադրբեջանում ձերբակալել են կեղծ մեղադրանքների հիման վրա: Ընտրությունները երկրում կեղծվում են: Կնշանակի՞, արդյոք, Ձեր նախագահությունը, որ Ադրբեջանը կբարձրացնի երկրում մարդու իրավունքների պաշտպանվածության մակարդակը` հավասարեցնելով Եվրոպայի խորհրդի չափանիշներին, թե՞ մյուս պետությունների չափանիշները կիջնեն ձեր անմխիթար մակարդակին»:

«Այս հարցը, սակայն, հունից հանել է Ալիևին, ինչպես բոլոր այլ` ոչ ձեռնտու հարցերը»,- գրում է Ֆլինը:

Նա հոդվածում խորհուրդ է տալիս Ալիևին կարդալ ԵԱՀԿ դիտորդների զեկույցը 2013-ին Ադրբեջանում կայացած նախագահական ընտրությունների վերաբերյալ, որում խոսվում է  լուրջ խախտումների մասին: Բրիտանացի պատգամավորի խոսքերով՝ իրավապահ կազմակերպությունները զգուշացնում էին, որ Ադրբեջանը չի համապատասխանում Եվրոպայի խորհրդի նախագահի դերին:

Ֆլինը նաև գրում է, որ Ալիևը նավթային հարստությունն օգտագործում է աշխարհին իր կողմը գրավելու համար:

«Խոսելով ԼՂ հակամարտության մասին՝ նա ինչ-որ քայլերի մասին ակնարկեց: Դիտորդները մտավախություն ունեն, որ գուցե նա ռազմական գործողություններ է պլանավորում: Մնում է միայն հուսալ, որ հակամարտությունը սառեցված կմնա և արյունահեղությունից կհաջողվի խուսափել»,- եզրափակում է նա: