Վարչապետին կանչելու` վարդենիսցիների պահանջը մարզպետն անլուրջ է համարել

Այսօր վարդենիսցիները ժամը 15-ին փակել են միջքաղաքային ճանապարհը` պահանջելով փոխհատուցում: Հիշեցնենք, որ երեկ հողմային քամու պատճառով բազմաթիվ վարդենիսցիներ նյութական վնաս են կրել` քամին  ջարդել է տանիքները, լուսամուտները, ծառեր ու էլեկտրական սյուներ տապալել, ինչի հետևանքով քաղաքի մի մասը զրկվել էր էլեկտրաէներգիայից ու գազից: Այսօր օրվա ընթացքում աշխատանքներ էին տարվում, որպեսզի էլեկտրական սյուները վերականգնվեն, և էլեկտրաէներգիայի մատակարարումը վերսկսվի:

Yerkir.am-ի հետ զրույցում Գեղարքունիքի մարզպետ Ռաֆիկ Գրիգորյանը նշեց, որ մի խումբ վարդենիսցիներ փակել էին ճանապարհը: Նրանց հետ հանդիպելու են գնացել Գեղարքունիքի մարզպետարանի երկու աշխատանքային հանձնաժողովների նախագահները, բացատրել են բողոքողներին, որ հանձնաժողովները աշխատում են, և այսօրվա ընթացքում պետք է ավարտեն աշխատանքները` մարզպետարան ներկայացնելով վնասի չափերը: Գեղարքունիքի մարզպետը նշեց, որ բողոքող վարդենիսցիների մոտ է եղել նաև ԱԺ պատգամավոր Կարեն Բոթոյանը:

«Շատ մարդիկ տեղյակ չեն եղել, որ ստեղծել է հանձնաժողով, որը ուսումնասիրում է վնասի չափերը: Ինձ զանգում, տեղեկացնում էին, որ բողոքողները պահանջում են վարչապետին: Ես միանգամից ասացի, որ դա անլուրջ պահանջ է, և պետք էր բացատրել մարդկանց, որ հանձնաժողովները աշխատում են, ու պետք է համբերատար սպասել»,- ասաց Ռաֆիկ Գրիգորյանը:

Մարզպետը նշեց, որ, ճանապարհը փակելով, մեկ ժամով խոչընդոտել են այն մեքենաների տեղաշարժին, որոնցով հենասյուները պետք է հասցվեին Վարդենիս:

«Ոստիկանության աշխատակիցները ժամանել են այդ վայրը և ուղեկցել, որպեսզի հենասյուները տեղափոխեն Վարդենիս: Թե ի՞նչ դժգոհություն էին այդ մարդիկ արտահայտում, վաղը կպարզեն համապատասխան մարմինները, որովհետև  բողոքողները կապ չեն ունեցել այն ընտանիքների հետ, որոնք կրել են վնասներ քամու պատճառով: Վաղը` ժամը 11-ին, հանձնաժողովները կներկայացնեն արդյունքները, կկազմվեն  համապատասխան փաստաթղթերը, որոնք  կներկայացվեն կառավարություն: Ես արդեն հեռախոսազրույց եմ ունեցել վարչապետի հետ, վարչապետը պատրաստակամ է օգնելու»,- ասաց Ռաֆիկ Գրիգորյանը` հավելելով, որ ներկա պահին բողոքողները գնացել են, նրանցից ոչ ոք չկա ճանապարհին: