Առաջարկեցին, որ Շանթ Հարությունյանի գործը քննի Ռուսաստանից գործուղված դատարանը

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց նոյեմբերի 5-ի անկարգությունների գործով դատական նիստը: Այսօրվա նիստում դատավոր Մնացական Մարտիրոսյանը ամբաստանյալների կենսագրական տվյալները ճշտելուց հետո հետաքրքրվեց` արդյո՞ք բացարկ չունեն դատավորի դեմ:

Ի պատասխան դատավորի` Շանթ Հարությունյանը հայտարարեց. «Եթե ես բացարկ հայտնեմ, նշանակում է ես հույս ունեմ, որ մեկ ուրիշը արդար կլինի, բայց տենց բան չկա»: Նա նաև հորդորեց մյուս ամբաստանյալներին` արժանապատիվ կերպով պայքարել մինչև վերջ: «Եթե գտնում եք, որ կա մի բան ձեր պահվածքում, որը կօգնի ձեզ շուտ ազատվել և գնալ տուն, խնդրեմ, դուք պրոբլեմ չունեք, բայց խնդրում եմ` թող դա չլինի որևէ մեկիս արժանապատվության հաշվին, ի վերջո, ժողովուրդը նայում է, լավ սկսել եք: Ուզում եմ` ձեր կյանքը արժանապատիվ կերպով մինչև վերջ ապրեք»,- ասաց նա:

Նշենք, որ այս գործով մեղադրանքը պաշտպանում են դատախազներ Գևորգյանը և Երիցյանը: Նրանց բացարկ հայտնեց  ամբաստանյալ Ալեք Պողոսյանը, ով առաջարկեց, որ այս գործը Ռուսաստանից գործուղված դատարանը քննի: «Քանի որ այս ամենն արվում է Ռուսաստանի համար` թող մեզ այնտեղից գործուղված դատարանը քննի»,- ասաց նա: Պողոսյանի բացարկին միացավ Շանթ Հարությունյանը:

Այս պահին դատավորը մտել է խորհրդակցական սենյակ` միջնորդության վերաբերյալ որոշում կայացնելու: