Զինվորի մահվան գործով նիստին մանեկեններ բերեցին. մահացածի մայրը վատ զգաց իրեն

Զինծառայող Լյուքս Ստեփանյանի սպանության մեջ մեղադրվող Դավիթ Խաչատրյանի պաշտպանները շուրջ 5 ժամ տևած դատաքննության ընթացքում ներկայացրին իրենց պաշտպանական ճառը: Ճառի ավարտին ամբաստանյալի պաշտպան Երեմ Սարգսյանը մանեկենների միջոցով ցուցադրեց, թե ինչպես է իրականում տեղի ունեցել դեպքը, սակայն երբ մանեկենները բերեցին նիստերի դահլիճ, մահացած Լյուքսի մայրը վատ զգաց իրեն և դուրս եկավ դահլիճից: «Ինչ դաժան ա աշխարհը»,- լացակումած ասաց նա և այլևս չներկայացավ դատաքննությանը:

Դավիթ Խաչատրյանի պաշտպան Երեմ Սարգսյանն ու Վաղարշակ Գևորգյանը միջնորդեցին վերաորակել իրենց պաշտպանյալին ՀՀ քր. օր.-ի 104 հոդ.-ի 2-րդ մասի 6-րդ կետով և ՀՀ քր. օր.-ի 112 հոդ.-ի 1-ին մասով առաջադրված մեղադրանքը և նրան մեղավոր ճանաչել ՀՀ ՔՕ 373րդ հոդվածի 3-րդ մասով ` զենքի, ռազմամթերքի հետ վարվելու կանոնները խախտելը, որն անզգուշությամբ պատճառել է մարդու մահ, կամ ՔՕ 105-րդ հոդվածի (հոգեկան խիստ հուզմունքի ընթացքում կատարված սպանությունը) հատկանիշներով, իսկ վատագույն դեպքում նրա արարքը պետք է որակել ՀՀ ՔՕ 104 հոդվածի 1-ին մասի հատկանիշներով: Վաղարշակ Գևորգյանը հայտարարեց, որ գործում Դավիթ Խաչատրյանի պատիժը ծանրացնող հանգամանքներ չկան, նա բնութագրվում է դրական հատկանիշներով, ֆիզիկապես վատառողջ է և այլն: Պաշտպանը խնդրեց դատարանին Դավիթ Խաչատրյանի արարքին տալ ճիշտ իրավական գնահատական և սահմանել համաչափ պատիժ:

Այսօր պաշտպանական ճառով պետք է հանդես գար նաեւ ամբաստանյալը, սակայն նա ասաց, որ իրեն վատ է զգում, եւ դատական նիստը հետաձգվեց մինչեւ հուլիսի 4-ը: