Տարոն Մարգարյանի աներձագը երաշխավորել է քաղաքապետի խորհրդականի որդու համար

Քանաքեռ-Զեյթունի նախկին թաղապետ, ներկայումս քաղաքապետ Տարոն Մարգարյանի խորհրդական Արայիկ Քոթանջյանի տան հարևանությամբ հունիսի 7-ի գիշերը տեղի ունեցած միջադեպի գործով ձերբակալված Քոթանջյանի որդին` Սամվելը, ինչպես նաև միջադեպի մյուս մասնակիցները ստորագրությամբ  ազատ են արձակվել:  Այս մասին yerkir.am-ին հայտնեցին ոստիկանությունից` նշելով, որ խորհրդականի որդու համար երաշխավորել է Ազգային ժողովի 2 պատգամավոր:

Ըստ panorama.am-ի` Սամվել Քոթանջյանի համար երաշխավորել են Ազգային ժողովի պատգամավորներ Ռոբերտ Սարգսյանը (Երևանի քաղաքապետի աներձագը) եւ Գագիկ Մելիքյանը:

Հիշեցնենք, որ փաստի առթիվ ոստիկանության քննչական գլխավոր վարչության Երևանի քննչական վարչության Քանաքեռ-Զեյթունի քննչական բաժնում հարուցվել էր քրեական գործ` ՀՀ քր օր-ի 235 հոդվածի 1-ին մասի (ապօրինի զնեք-զինամթերք կրելը, պահելը, օգտագործելը) և 258 հոդվածի 4-րդ մասի (խուլիգանություն, որը կատարվել է զենքի օգտագործմամբ) հատկանիշներով: