«Կանազի» հոսպիտալի ծեծկռտուքին մասնակից զինվորներն իրենց մեղավոր չճանաչեցին

Երկու անգամ անընդմեջ հետաձգվելուց հետո այսօր վերջապես մեկնարկեց նախորդ տարեվերջին «Կանազի» հոսպիտալում տեղի ունեցած ծեծկռտուքի փաստի առթիվ հարուցված աղմկահարույց քրեական գործով դատական նիստը:

 

Հիշեցնենք, որ հարուցված քրեական գործի շրջանակներում մեղադրանք է առաջադրվել 4 զինծառայողի: Ամբաստանյալներ Ռազմիկ Մանուկյանի և Արշակ Թորոսյանի նկատմամբ խափանման միջոց է ընտվել կալանավորումը, իսկ Դավիթ Մարկոսյանի և Գարեգին Դանիելյանի նկատմամբ՝ ստորագրություն չհեռանալու մասին: Այսօրվա նիստում Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավոր Արթուր Մկրտչյանն ամբաստանյալներից ճշտեց նրանց անձնական տվյալները:

 

Ըստ այդմ` պարզ դարձավ, որ մեղադրյալի աթոռին նստած չորս զինծառայողներն էլ մարզերից են: Մասնավորապես` Ռազմիկ Մանուկյանը նշեց, որ ինքն Արմավիրից է, ունի 8-ամյա կրթություն, Դավիթ Մարկոսյանը հայտնեց, որ Վանաձորից է, տառապում է շիզոֆրենիա հիվանդությամբ և նախկինում դատապարտված է եղել: Գարեգին Դանիելյանն էլ, ով բնակվում էր Վայքում, նշեց, որ ունի 9-ամյա կրթություն, ամուսնացած է, ունի մեկ տարեկան երեխա: Արշակ Թորոսյանն էլ նշեց, որ Ստեփանակերտից է:

 

Այսօրվա նիստում հայտնի դարձավ, որ փոխվել է մեղադրող դատախազը: Մեղադրանքն այսուհետ դատարանում կպաշտպանի զինվորական կայազորի դատախազ Ամիրյանը:

 

Դատավորի այն հարցին, թե` ստացե՞լ եք ձեր իրավունքների ու պարտականությունների վերաբերյալ դատարանի ուղարկած հուշաթերթիկները, ամբաստանյալները պատասխանեցին` ոչ:

 

Մեղադրող դատախազը հրապարակեց մեղադրական եզրակացության եզրափակիչ մասը: 4 ամբաստանյալներն էլ իրենց մեղավոր չճանաչեցին:

 

Այսպես` շարքային զինծառայող Ռազմիկ Մանուկյանին մեղադրանք է առաջադրվել այն բանի համար, որ նա, գտնվելով ստացիոնար բուժման մեջ ՀՀ ՊՆ հոսպիտալի հոգեբուժական բաժանմունքում, ալկոհոլի ազդեցության տակ, նշված բաժանմունքում բուժման մեջ գտնվող ժամկետային զինծառայողներ` շարքայիններ Արշակ Թորոսյանի և Դավիթ Մարկոսյանի հետ՝ մի խումբ անձանցով, բռնություն գործադրելու սպառնալիք են հնչեցրել զինվորական ծառայության պարտականությունները կատարելու կապակցությամբ իրենց դիտողության անող զինվորական ծառայության և կոչումով իրենց նկատմամբ պետ, հոսպիտալի հրամանատար, բ/ծ փոխգնդապետ Սահակ Օհանյանի, բժիշկներ, բ/ծ մայորներ Վաղինակ Հովհաննիսյանի, Արմեն Հովսեփյանի, Լևոն Բալայանի և Էմիլ Բաբաջանյանի հանդեպ, բռնություն է գործադրել Ս.Օհանյանի նկատմամբ՝ քաշքշել և պատռել նրա շապիկը: Ապա հնչեցրած սպառնալիքն առավել առարկայական դարձնելու նպատակով, կողապահարանը որպես զենք օգտագործելով, նետել է Ս.Օհանյանի ուղղությամբ: Իսկ Ա.Թորոսյանը՝ Է.Բաբաջանյանի ուղղությամբ: Այնուհետև, դուրս գալով հոգեբուժական բաժանմունքի մասնաշենքից, դիտավորությամբ կոպիտ կերպով խախտելով հասարակական կարգը՝ բացահայտ անհարգալից վերաբերմունք է դրսևորել հասարակության նկատմամբ՝ մոտ 15 րոպե սեռական բնույթի հայհոյանքներ է հնչեցրել»:

 

Իսկ զինծառայող Գարեգին Դանիելյանն էլ մեղադրվում է «հոսպիտալում` իրենից բջջային հեռախոսն ուզելու կապակցությամբ առաջացած վիճաբանության ընթացքում, իրեն հայհոյելու և հարվածելու համար բռնություն գործադրելով, ոտքով մեկ անգամ ժամկետային զինծառայող Դավիթ Մարկոսյանի ոտքին հարվածելու մեջ: »: