Հայաստանի 11 ազգային փոքրամասնություններ մասնակցել են «Հայաստանը մեր տունն է» փառատոնին

Այսօր Հայաստանի պետական ֆիլհարմոնիան անցկացրեց ՀՀ ազգային փոքրամասնությունների մշակույթի փառատոնը՝ դեկորատիվ-կիրառական արվեստի իրերի ցուցադրությամբ և համերագային ծրագրով: «Հայաստանը մեր տունն է» խորագրով փառատոնն անցկացվեց մշակութային բազմազանության օրվա առթիվ մշակույթի նախարարության ֆինանսավորմամբ:

Համերգային ծրագրին մասնակցեցին ՀՀ ազգային 11 փոքրամասնության 15 խումբ, այդ թվում՝ 2 խմբով ներկայացավ հունական համայնքը, 3 խմբով` ասորականը: Որոշ խմբեր՝ հրեականը, վրացականը, լեհականը, ուկրաինականը, բացի իրենց ազգային երգարվեստից, ներկայացրին նաև հայկական ստեղծագործություններ:

Փառատոնին առաջին անգամ մասնակցեց հունական «Խարիտոնի» վոկալ-գործիքային համույթը, որը հանդես եկավ հայ-հունական ժողգործիքների (քանոն, բուզուկի) զուգորդմամբ:

«Մշակույթների բազմազանության պահպանման հարցն արդի աշխարհում կարևորագույն խնդիրներից է»,- նշված է մշակույթի նախարարության տարածած հաղորդագրության մեջ: