Օլանդի այցը Հայաստան այցելություն էր հին բարեկամին

Ֆրանսիայի նախագահ Ֆրանսուա Օլանդի այցը Հայաստան հին բարեկամի մոտ այցելություն էր. լրագրողներին այսօր ասաց ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը:

Նա նշեց, որ, հաշվի առնելով տարածաշրջանում տեղի ունեցող զարգացումները, մասնավորապես` Ուկրաինայի դեպքերը, Օլանդի այցը մեր տարածաշրջան բավական կարևոր իրադարձություն էր: Կարևոր էր նաև այն դիտանկյունից, որ Հայաստանը Ռուսաստանի կողմից դիտարկվում է որպես իր ազդեցության տակ գտնվող շրջան, և այդտեղ գալիս է արևմտյան խոշոր երկրներից մեկի նախագահը:

«Օլանդը թեև նշեց, որ որքան էլ փորձենք երկու երկրների մեջ տարաձայնություններ գտնել, դրանք չեն գտնվի, սակայն խոսեց նաև այն մասին, որ Հայաստանի և Ֆրանսիայի տնտեսական հարաբերությունները, սակայն, չեն համապատասխանում երկու երկրների միջև եղած բարեկամական հարաբերություններին: Եվ դրանք ընդլայնելու տեղ կա»,- ասաց Կ. Մանոյանը:

Ինչ վերաբերում է վերջերս  նշված` Ցեղասպանության 99-ամյա տարելիցին, Կ. Մանոյանը կարևորեց նաև Օլանդի այն հայտարարությունը, որով նա թեև դրական գնահատական է տալիս Էրդողանի ցավակցական հայտարարությանը, այնուամենայնիվ, նշում, որ Թուրքիան պարտավոր է ընդունել Ցեղասպանությունը:

Բանախոսի կարծիքով` կարևոր է նաև Օլանդի` Արցախի հետ կապված հայտարարությունը, որ Ֆրանսիան խնդիր չի տեսնում արցախցիների կամաարտահայտության կամ անցկացված հանրաքվեի մասով:

Հայ-ֆրանսիական հարաբերությունների հետ կապ չունեցող մի կետ նշեց Կ. Մանոյանը` իշխանությունների կողմից ձախողում էր Օլանդի հետ պաշտոնական հանդիպումներին ընդդիմությունից որևէ մեկին չհրավիրելը, երբ Ֆրանիսան մեծ պատվիրակությամբ էր եկել, և նրանց թվում էին նաև ընդդիմադիր գործիչներ: