«Փարաջանովը» կհասնի նաև Հնդկաստան

Երեկ «Հայակ 2014» մրցանակաբաշխության ժամանակ Սերժ Ավետիքյանի «Փարաջանով» ֆիլմը 4 մրցանակի է արժանացել:

Yerkir.am-ի հետ զրույցում Ավետիքյանը նշեց, որ ֆիլմը մինչև տարեվերջ ֆրանսիական կինովարձույթում կլինի:

«Գիտեք` ինչն է հետաքրքիր` չնայած ֆիլմը Ֆրանսիայում արդեն 5 մրցանակ է շահել, սակայն շատ դժվար էր այնտեղ կինովարձույթի հանել այն: Ֆիլմը ես չեմ նկարել, որպեսզի այն փառատոների մասնակցի կամ մրցանակների արժանանա. ռեժիսորը չպետք է մտածի այդ մասին, հակառակ դեպքում` դու կորցնում ես ֆիլմ նկարելու հաճույքը և ուղղակի ինչ-որ բան անում` հատուկ նպատակով»,- ասաց Ավետիքյանը` հավելելով, որ հիմա այնքան շատ են հրավերները, որ ինքն անգամ ընտրելու հնարավորություն ունի` որին մասնակցել, որին` ոչ: «Առաջիկայում մեկնելու եմ Հնդկաստան, և այնտեղ էլ ֆիլմը մի քանի փառատոնի կմասնակցի»,- հայտնեց նա:

Ավետիքյանը տեղեկացրեց նաև, որ Փարաջանովին կերպավորելիս իր առջև խնդիր էր դրել չնմանվել նրան, ձևեր չթափել ու չխաղալ. «Արդյունքում նկարահանման ժամանակ մենք զգում էինք նրա ներկայությունը, նրա շունչը»:

Նա նշեց նաև, որ այժմ զբաղված է «Վերջին ռաունդը Ստամբուլում» ֆիլմի նկարահանման աշխատանքներով, որոնք մեծ թափով առաջ են գնում:

Հիշեցնենք, որ «Փարաջանով» ֆիլմը «Հայակ» մրցանակաբաշխությունում ճանաչվել էր հաղթող «Լավագույն խաղարկային ֆիլմ», «Լավագույն ռեժիսոր», «Լավագույն դերասան», «Լավագույն նկարիչ» անվանակարգերում: