«Ժառանգությունը» չի հանդիպելու Սերժ Սարգսյանի հետ ու նոր կառավարությանը մաս չի կազմելու

Վարչապետի պաշտոնում Րաֆֆի Հովհաննիսյանի համար ընդունելի չէ Հովիկ Աբրահամյանի թեկնածությունը: Այսօր  Ազատության հրապարակում «հանրային հայտարարությունից» հետո «Ժառանգություն» կուսակցության ղեկավարը նշեց այս մասին, իսկ հարցին' կուսակցությունն ունի՞ վարչապետի սեփական թեկնածու, պատասխանեց կարճ. «Մենք ունենք նախագահի մեր թեկնածուն»:

Նա հայտարարեց, որ ժողովրդի, քաղաքական ու քաղաքացիական ուժերի ճնշման շնորհիվ փոխվեցին վարչապետն ու կառավարությունը, բայց եթե լրիվ չփոխվի Հայաստանի կառավարման մոդելը' վերից վար, ոչ մի բան չի փոխվի:

Խորհրդարանական ոչ իշխանական 4 ուժերի համագործակցությունը ԱԺ ներսում, նշեց Րաֆֆի Հովհաննիսյանը, կշարունակվի, սակայն հարցն այն է, թե կկարողանա՞ն արդյոք այդ ուժերը խորհրդարանից դուրս` ավելի գլոբալ համագործակցել ու հասնել ամբողջական իշխանափոխության: Այս պահին, ըստ նրա, քանի դեռ տեղի չի ունեցել այդ ուժերի ղեկավարների հանդիպումն ու միասնական դիրքորոշումը, չի կարելի խոսել քառյակի մասին, այլ միայն պետք է խոսել խորհրդարանական ուժերի համագործակցության մասին:

Րաֆֆի Հովհաննիսյանը հստակ նշեց, որ ձեւավորվելիք կառավարության կազմում, հաստատ, «Ժառանգության» ներկայացուցիչներ չեն լինելու, որ «Ժառանգություն»-ը չի համագործակցելու, նրա խոսքերով, «իշխանությունը ժողովրդից գողացած» իշխանության հետ, եւ ով էլ լինի հաջորդ վարչապետը, լինելու է ոչ լեգիտիմ իշխանությունների ներկայացուցիչը: Նա միանշանակ ու հստակ ասաց նաեւ, որ «Ժառանգությունը» չի հանդիպելու Սերժ Սարգսյանի հետ:

Լրագրողների հարցին, թե ի՞նչ պետք է քննարկեն ոչ իշխանական ուժերի ղեկավարները, եթե հանդիպեն, Սերժ Սարգսյանի հրաժարականի հա՞րցը, ինչին Րաֆֆի Հովհաննիսյանը պատասխանեց, թե ոչ միայն Սերժ Սարգսյանի հրաժարականի հարցն է դրվելու, այլ  կան նաեւ որոշումների ընդուման մեխանիզմներին, արտաքին քաղաքականությանը վերաբերող  եւ բազում այլ հարցեր: