Երբ մարդու ներկան ապահովված չէ, նա չի կարող մտածել ապահով ապագայի մասին

Երբ մարդու ներկան ապահովված չէ, նա չի կարող մտածել ապահով ապագայի մասին. Yerkir.am-ի հետ զրույցում նշեց «Empyray» ռոք-խմբի երաժիշտ, երգահան Գիսանե Պալյանը` խոսելով պարտադիր կենսաթոշակայինի մասին:

Հիշեցնենք, որ այսօր ՍԴ-ն քննում է պարտադիր կուտակայինի մասին օրենքի սահմանադրականությունը:

Պալյանը նշեց, որ հարցի իդեալական լուծումը պարտադիրը ըստ ցանկության դարձնելը կլինի, քանի որ մենք գիտենք, թե ինչ սոցիալական վիճակում է գտնվում մեր ժողովուրդը:

«Թելադրում են մտածել ապագայի մասին, որը շատ մեծ հարցականի տակ է, քանի որ ներկան ապահով չէ: Եթե կան մարդիկ, որոնց ներկան ապահով է, և նրանք ցանկություն կունենան մտածել ապագայի մասին, ըստ ցանկության` թող այդ օրենքով շարժվեն: Հակառակ դեպքում` ինձ թվում է, որ սա մարդու իրավունքների ոտնահարում է»,- ասաց երաժիշտը:

Նրա կարծիքով` եթե, այնուամենայնիվ, օրենքը կյանքի կոչվի, պետք է ամեն գնով բողոքարկել, դուրս գալ փողոց, քանի որ փորձը /տրանսպորտի թանկացման հարցը/ ցույց տվեց, որ մասսայական բողոքի ալիքները, որոնք սոցիալական բունտի, այլ ոչ թե քաղաքական որևէ երանգ են ունենում, հասնում են իրենց արդյունքին: