Դերենիկ Դումանյանը դեմ է թունդ ալկոհոլային խմիչքների գովազդին

Այսօր ԱԺ ՀՅԴ խմբակցության քարտուղար Աղվան Վարդանյանը կառավարության հետ հարցուպատասխանի ժամանակ այդպես էլ չլսեց ՀՀ առողջապահության նախարար Դերենիկ Դումանյանի դիրքորոշումը ԱԺ-ի կողմից ժամեր առաջ ընդունված օրինագծի մասին, որը թույլատրում էր հեռուստաընկերություններին գովազդել թունդ ալկոհոլային խմիչք, սակայն լրագրողների հետ զրույցում Դերենիկ Դումանյանը չկարողացավ խուսափել այդ հարցից:

Նա նշեց, որ ինքը դեմ է թունդ ալկոհոլային խմիչքը գովազդելուն: «Կառավարության նիստի ժամանակ ես իմ բացասական տեսակետը հայտնել եմ այդ օրինագծի վերաբերյալ, սակայն այստեղ խնդիրը դրված է տնտեսական ակտիվ գործողությունների վրա: Այդ օրինագծի ընդունումը կարող է տնտեսական լրացուցիչ ակտիվություն բերել և նոր ֆինանսական հոսքեր նախատեսել: Ազգային ժողովն օրենքն ընդունելուց հենց այս փաստերն է հաշվի առել»,- ասաց Դերենիկ Դումանյանը:

Դիտարկմանը, թե նախարարի բացասական գնահատականը դրական արդյունք չտվեց, և օրինագիծն ընդունվեց ԱԺ-ի կողմից, Դերենիկ Դումանյանն ասաց. «Կառավարությունը չի որոշում օրենքների ընդունման հարցը, այլ Ազգային ժողովը: Ես կառավարությունում տեղի ունեցած քննարկման ժամանակ իմ բացասական տեսակետն արտահայտել եմ: Թե Ազգային ժողովն ի՞նչ եզրահանգում կտա, դա այլ հարց է»: