Դատական դեպարտամենտի նախկին ղեկավարի կալանքի ժամկետը երկարաձգվեց

Կենտրոն և Նորք-Մարաշ վարչական շրջանների ընդհանուր իրավասության դատարանը բավարարել է նախաքննական մարմնի միջնորդությունը և ևս երկու ամսով երկարաձգել դատական դեպարտամենտի նախկին ղեկավար Միսակ Մարտիրոսյանի կալանքի ժամկետը:

Միսակ Մարտիրոսյանի պաշտպան Վարդան Զուռնաչյանը, ով այսօր է ստացել կալանքը երկարաձգելու վերաբերյալ`  դատարանի որոշումը, yerkir.am-ին հայտնեց, որ այն կբողոքարկի Վերաքննիչ դատարանում: Ըստ նրա` իր պաշտպանյալն արդեն 4 ամիս է` կալանքի տակ է, սակայն նրա նկատմամբ որևէ էական քննչական գործողություն չի կատարվել: «Սկզբնական շրջանում մեկ անգամ հարցաքննել են և գործով փորձաքննություններ նշանակել»,- ասաց փաստաբանը:

Հիշեցնենք, որ Մարտիրոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 311-րդ հոդվածի 1-ին մասով, 3-րդ մասի 2-րդ և 3-րդ կետերով՝ աշխատանքի ընդունելու համար խոշոր չափերի կաշառք ստանալու և դատական կարգադրիչների համակարգում աշխատավարձերի յուրացման դեպքերի առթիվ: