ՀՀԿ-ին ամբիցիա՞ն խանգարեց

ԱԺ այսօրվա նիստում ԱԺ նախագահ Հովիկ Աբրահմյանը խոստացավ առաջիկայում անդրադառնալ գազի հարցերով հանձնաժողով ստեղծելու ոչ իշխանական ուժերի նախաձեռնությանը: «Մենք անպայման կանդրադառնանք այդ հարցերին ու նախաձեռնությանը: Մենք քննարկումներ կկազմակերպենք ու ես կոչ եմ անում, որ բոլոր քաղաքական ուժերը ակտիվորեն մասնակցեն այս քննարկումներին»,- ասաց Հովիկ Աբրահամյանը:

Yerkir.am-ի հետ զրույցում անդրադառնալով Հովիկ Աբրահամյանի այս հայտարարությանը, ԱԺ ՀԱԿ խմբակցության պատգամավոր Արամ Մանուկյանը նշեց, որ եթե ստեղծվի հանձնաժողով Հանրապետական կուսակցության նախաձեռնությամբ և եթե այն պետք է քննարկի այդ բոլոր խնդիրները, ուրեմն ոչ իշխանական խմբակցությունները որևէ խնդիր չեն տեսնում, թող բերեն առաջարկությունը ԱԺ քննարկման:

Արամ Մանուկյանի խոսքով՝ Հովիկ Աբրահամյանը դեռ մի քանի օր առաջ ասաց, որ եթե չորս ոչ իշխանական քաղաքական ուժերը իր հետ խորհրդակցեին նախապես, գուցե Հանրապետական խմբակցությունը ևս միանար այդ նախաձեռնությանը: «Եթե քաղաքական մեծամասնությունը գնում է այդ համարձակությանը, շատ լավ»,- ասաց Արամ Մանուկյանը: Մեր այն հարցին՝ ինչ իմաստ ունի նոր հանձնաժողով ստեղծել, եթե քաղաքական մեծամասնությունը արդեն մերժեց այդ առաջարկությունը, պատգամավորը նշեց. «Գուցե ամբիցիայի հարց է, որ իրենք լինեն նախաձեռնողը, ոչ թե մենք»:

Արամ Մանուկյանը նաև նշեց, որ ինքը չի հավատում, թե քաղաքական մեծամասնությունը կարող է նախաձեռնել ցանկացած ֆորմատով մի երևույթ, որը պետք է ուսումնասիրի գազային գործարքը. «Չեմ հավատում, որ իշխանությունը բացի իր իսկ գաղտնիքները: Ամեն դեպքում ես անձամբ Հովիկ Աբրահամյանին ասել եմ, որ մենք ամբիցիայի խնդիր չունենք, ու կարևորը ոչ թե այն է, թե ով է նախաձեռնում ու ներկայացնում, այլ կարևորը հարցի բովանդակությունն է»,- ասաց Արամ Մանուկյանը: