Ճշմարտությո՞ւն եք ուզում պարզել, պարզեք նրանից. ՀՀԿ-ն դեմ է քվեարկելու

«Ուզում եմ խոսել շարքային քաղաքացու մասին: Բավական ցուրտ եղանակ էր, և քաղաքացիները դժվարությամբ էին գումար հայթայթում` գազի վճարները կատարելու համար: Բայց այդ ընթացքում պետությունը, կառաավարությունը մտածում էր հենց խոշոր տնտեսվարողների ու ներդրողների մասին: Մտածում էր տնտեսության կայուն զարգացման մասին»,- ԱԺ նիստում Հանրապետական խմբակցութան անունից ելույթ ունենալով՝ ասաց ԱԺ ՀՀԿ խմբակցության պատգամավոր Գագիկ Մինասյանը:

Հիշեցնենք, որ խմբակցությունների ելույթները վերաբերում են ՀԱԿ խմբակցության նախաձեռնությանը՝ ստեղծել ժամանակավոր հանձնաժողով՝ ուսունասիրելու համար գազային պայմանագրերը, գազի գնի գոյացումը և 300 միլիոն դոլարի պարտքը:

Պատգամավորը նշեց, որ այսօր ԱԺ-ում ելույթ է ունենալու հանրային ծառայությունները կարգավորող հանձնաժողովի նախագահը, և ընդդիմադիր պատգամավորները կարող են իրենց հուզող հարցերի պատասխանները ստանալ նրանից:

«Ճշմարտությո՞ւն եք ուզում պարզել, պարզեք նրանից: Դրանից ավելի ցիվիլ ճանապարհ էլ կա՞: Եթե չի բավարարում, կարող եք հրավիրել խորհրդարանական լսումներ, որոնք շատ լիբերալ են անցնում: Թե չէ` ես կամաց-կամաց մտածում եմ, որ ընդդիմությունը այլ ցանկություններ ունի: Մոլորեցնում եք հասարակությանը, որովհետև եթե դրսում ցուրտ է, ուրեմն շատ գազ է սպառվելու»,- ասաց Գագիկ Մինասյանը՝ հավելելով, որ ՀՀԿ-ն դեմ է քվեարկելու այդ հանձնաժողովի ստեղծման առաջարկությանը: