Որեւէ սադրանք չի կարող ինձ շեղել իմ ստանձնած առաքելությունից. Սամվել Բալասանյան

Գյումրիի քաղաքապետ Սամվել Բալասանյանը հանդես է եկել հայտարարությամբ` կապված մամուլում հայտնված այն տեղեկությունների հետ, թե Գյումրիի նախկին քաղաքապետ Վարդան Ղուկասյանի որդին, հարբած վիճակում, մի խումբ ընկերների հետ երկու մեքենայով գնացել է Սամվել Բալասանյանի տուն ու հերթական «դեբոշը» սարքել:

Բալասանյանի հայտարարության մեջ ասված է.

«Սիրելի գյումրեցիներ

Ընտրված օրվանից ամեն ինչ արել եմ եւ շարունակելու եմ անել, որ Գյումրին նմանվի մեր երազանքների քաղաքին:

Աղբահանություն, փողոցային լուսավորություն, ճանապարհաշինություն, օգնություն կարիքավոր ընտանիքներին, կանգառների բարեկարգում՝ այս ամենը պահանջում է լարված ու ամենօրյա աշխատանք:

Վստահեցնում եմ Ձեզ, որեւէ սադրանք չի կարող ինձ շեղել իմ ստանձնած ծանր, բայց պատվաբեր առաքելությունից:

Ես մնալու եմ Գյումրիում եւ շարունակելու եմ Ձեզ հետ միասին շենացնել մեր քաղաքը»: