Քանի որ սա թուրքական պետության իրագործած ոճիրն է, արդարության ակնկալիք չունենք նրանից. ''Ակօս''-ի խմբագիր (Տեսանյութ)

«Ակօս» թերթի խմբագիր Ռոբեր Քոփթաշը Հրանտ Դինքի սպանության 7-րդ տարելիցի կապակցությամբ խոսել է NTV-ի եթերում:

«Ցավոք, Հրանտն ավելի հայտնի դարձավ ոչ թե իր գրածներով, այլ իր դատով և ապա` մահով: Ողջ եղած ժամանակ նրան շատերը չէին ճանաչում, սական մահից հետո շատերը սկսեցին հետաքրքրվել նրա արած գործերով, գրածներով: Թուրքիայում դեռևս կան միլիոնավոր մարդիկ, ովքեր Հրանտին ճանաչում են այնպես, ինչպես Թուրքիայում նա ներկայացվում է: Նրանք Հրանտին ճանաչում են որպես թուրքերի թշնամի, Թուրքիայի կառավարության և ժողովրդի դեմ գործող հայ ազգայնականի:

Այսօր մենք Հրանտի հիշատակի համար ենք հավաքվել, սակայն հիշելու լավագույն ձևը նրան հասկանալն է: Կցանկանամ, որ բոլոր նրանք, ովքեր Հրանտին որպես թուրքերի թշնամի են տեսնում, այսօր  կես ժամ տրամադրեն և համացանցում լսեն նրա ելույթները: Վստահ եմ, որ Հրանտն ինքն իրեն ավելի լավ կբացատրի, քան այս պետության կամ որոշ ազգայնամոլ գրողներ: Հրանտ Դինքը ցանկանում էր, որ Թուրքիայում ազատություն և հավասարություն լինի, բայց նրան սխալ ներկայացրեցին մեզ: Այս պետությունից մենք արդարության ոչ մի ակնկալիք չունենք: Քանի որ այս ոճիրը իրականացվել է այս պետության կողմից, հետևաբար` արդարության ակնկալիք չունենք նրանից»,- ասել է Քոփթաշը: