Մենք իրավունք չունենք թուլացնելու պայքարը. Արծվիկ Մինասյան

Այսօր սոցիալ-տնտեսական ծանր պայմանների, երկրում էլեկտրաէներգիայի, գազի բարձր սակագների առկայության պարագայում պարտադրվում է կենսաթոշակների պարտադիր կուտակման արատավոր համակարգը. հանրահավաքի մասնակիցներին ասաց ՀՅԴ պատգամավոր Արծվիկ Մինասյանը` կոչ անելով.  «Մենք ձեզ հետ միասին պետք է ասենք` ո'չ, պետք է կարողանանք վճռական պայքար մղել այս օրենքի դեմ»:

Նա կոչ արեց նաեւ մինչև մարտի 25-ը` ՍԴ-ում օրենքի նախագծի սահմանադրականության հարցը վիճարկելու օրը, լսելի դարձնել բողոքի ձայնը: «Մեր վերջնական հաղթանակը պետք է արձանագրենք մարտի 25-ին, մենք իրավունք չունենք թուլացնելու պայքարը, որպեսզի մարտի 25-ին արձանագրենք, որ հաղթեց հայ ժողովրդի կամքը: Հաղթանակ, Հայաստա’ն»,- հայտարարեց նա:

Այս պահին հավաքի մասնակիցները երթով շարժվում են դեպի Մաշտոցի պողոտա: Հավելենք, որ քիչ առաջ էլ ակցիայի մասնակիցներին մոտեցավ Երևանի փոխոստիկանապետ Վալերի Օսիպյանը և կոչ արեց սադրանքների չգնալ, ինչպես նաև չսահմանափակել տրանսպորտային միջոցների տեղաշարժը:

«Դեմ եմ» նախաձեռնության անդամներն էլ, իրենց հերթին, հայտարարեցին, որ երթը կրում է խաղաղ բնույթ, և մասնակիցներին հորդորեցին չխախտել հասարակական կարգը: