Հնարավոր չէ լուծել հակամարտությունը, եթե կողմերը դա չեն ցանկանում. Շվեյցարիայի ԱԳՆ ղեկավար

ԵԱՀԿ նախագահությունը ստանձնած Շվեյցարիայի ԱԳՆ ղեկավարը խոսել է առաջնահերթությունների մասին: Նա ելույթ է ունեցել ԵԱՀԿ Մշտական խորհրդի նիստում. հայտնում է АПА-ն:

Դիդիե Բուկհալթերը նշել է, որ կառույցի նախագահությունը ստանձնելը մեծ պատասխանատվություն է, և 2014-ին Շվեյցարիան ուշադրություն է դարձնելու ԵԱՀԿ-ի անվտանգությանն ու կայունությանը։

Այլ հարցերի հետ մեկտեղ նա անդրադարձել  է նաև սառեցված հակամարտություններին, այդ թվում՝ Լեռնային Ղարաբաղի խնդրին։

«Բոլորս պատասխանատու ենք այդ հակամարտությունների արդար և երկարատև լուծման համար։ Մենք գիտենք, որ այդ խնդիրները մի գիշերում չեն կարող լուծվել։ Արդյունքի հասնել հնարավոր չի լինի, եթե կողմերը դա չեն ցանկանում։ ԼՂ հակամարտության լուծման հետ կապված` արձանագրվեցին որոշ դրական քայլեր: Շվեյցարիան շարունակելու է աջակցել ՄԽ համանախագահներին Ադրբեջանի և Հայաստանի քաղաքացիական հասարակությունների ներկայացուցիչների և փորձագետների հանդիպում կազմակերպելու հարցում»,-ասել է Շվեյցարիայի արտգործնախարարը։