Եղվարդի ճշտապահ դատավորը

Այսօր Կոտայքի մարզի առաջին ատյանի դատարանում (նստավայրը՝ Եղվարդ), դատավոր Յուրի Բաղդասարյանի նախագահությամբ, ժամը 16:00-ին նշանակված էր դերասան Վարդան Պետրոսյանի ձերբակալման որոշման դեմ նրա փաստաբան Նիկոլայ Բաղդասարյանի բողոքի քննությունը: Սակայն նիստը մեկնարկից 10 րոպե անց հետաձգվեց պաշտպանի չներկայանալու պատճառով:

Նիստերի քարտուղարը լրագրողներին տեղեկացրեց, որ իրենց չի հաջողվել կապ հաստատել Բաղդասարյանի հետ, սակայն yerkir.am-ի հետ զրույցում փաստաբանը նշեց, որ ճանապարհին է և քիչ անց կներկայանա: Փաստաբանին դատարանից հայտնել էին, որ չեն կարող նիստը վերսկսել, քանի որ դատախազը չի ժամանել, իսկ գործով քննիչը արձակուրդում է:

Նշենք, որ դատավորը դռնփակ դատական կարգով է հայտարարել նիստի հետաձգման մասին:

Հաջորդ դատական նիստը նշանակվեց հունվարի 11-ին: