Իրանը խոստումը կկատարի. դեսպան

Իրանը ի սկզբանե հայտարարել է  Հայաստանի կառավարությանն  ու իշխանություններին, որ թեեւ հայ-իրանական երկաթգծի կարիքն առանձնապես չունի, բայց եթե կգտնվեն ներդրողներ, ու Հայաստանում կսկսվեն երկաթգծի շինարարական աշխատանքները, Իրանը պատրաստ է իր տարածքի 60 կիլոմետրանոց հատվածը իր պետական բյուջեի միջոցներով կառուցել. լրագրողների հետ հանդիպման ժամանակ հավաստիացրեց Հայաստանում Իրանի արտակարգ եւ լիազոր դեսպան Մուհամմադ Ռեյիսին: Բացի այդ` Իրանը պատրաստակամություն է հայտնել նաեւ ինժեներա-տեխնիկական խորհրդատվությունների տեսքով մասնակցել հայաստանյան հատվածի շինարարությանը:

Լրագրողները հարց բարձրացրեցին, որ դեպի Ռուսաստան երկաթգիծ է կառուցվում Ադրբեջանի տարածքով, այդ դեպքում հայ-իրանական երկաթգծի կարիքն Իրանը ընդհանրապե՞ս չի ունենա: Մուհամմադ Ռեյիսին պատասխանեց. «Եթե խոսք ենք տվել, այստեղ էլ մենք մեր խոստումը կկատարենք: Իրանն ունի շատ կոմունիկացիոն հնարավորություններ` դեպի Թուրքմենստան, Ղազախստան, դրանից հետո` Եվրոպա, կարող է կապվել նաեւ Ադրբեջանի հետ, Հայաստանի հետ. բազմաթիվ կոմունիկացիոն ուղիներ կան»: