Պետբյուջեից 12 միլիոնով մասնավոր ընկերության համար ''Что? Где? Когда?'' խաղի արտոնագիր ձեռք կբերեն

Կառավարությունն իր այսօրվա նիստում որոշեց ռուսական «Իգրա Թի Վի» հեռուստաընկերությունից «Ինչ, որտեղ, երբ» հեռուստանախագծի արտոնագիրը եւս մեկ տարով (2013 թվականի դեկտեմբերից մինչև 2014 թվականի դեկտեմբեր) ձեռք բերելու նպատակով ԿԳՆ-ին 2013 թվականի չորրորդ եռամսյակում հատկացնել 12 միլիոն դրամ` «Փի-Արտ» ՍՊԸ-ին տրամադրելու համար:

Որոշման նախագիծը ներկայացնում էր ԿԳ փոխնախարար Կարինե Հարությունյանը: Նա իր կողմից ավելացրեց, որ հաղորդումը մեծ ժողովրդականություն է վայելում, բարձր վարկանիշ ունի, նաեւ` ինտելեկտուալ զարգացման նշանակություն:

Վարչապետ Տիգրան Սարգսյանը հետաքրքրվեց արդարադատության նախարար Հրայր Թովմասյանից` ո՞վ մասնակցում է այդ խաղին, կառավարության թիմն ի՞նչ հաջողություններ ունի այդ բնագավառում: Հրայր Թովմասյանը չհայտնեց  վերջին խաղի արդյունքները, իսկ երբ վարչապետը հետաքրքրվեց, թե ե՞րբ են այն ցուցադրելու, Հրայր Թովմասյանը պատասխանեց. «Հատուկ` տոներից հետո, որ քիչ մարդ տեսնի...»:

Լրագրողները Կարինե Հարությունյանից հետաքրքրվեցին, թե ո՞վ է չափել խաղի վարկանիշը, որ համոզմունք կա, թե մեծ ժողովրդականություն է վայելու: Փոխնախարարը պատասխանել չկարողացավ: Թե ինչքանո՞վ է նպատակահարմար Հայաստանի պես աղքատ երկրում նման գնում կատարել մասնավոր ընկերության համար, Կարինե Հարությունյանը կրկնեց, թե այն ունի «բավականին լուրջ ինտելեկտուալ զարգացման եւ կրթական նշանակություն», որը, ըստ նրա, ԿԳՆ-ում հաշվարկել են, բայց համոզված չէ:

Լրագրողները նաեւ հետաքրքրվեցին, թե ինչո՞ւ հենց ռուսերենով անցկացվող խաղի արտոնագրի ձեռքբերում է ֆինանսավորում կառավարությունը, ընդ որում` հարկատուների միջոցների հաշվին, ինչին Կարինե Հարությունյանը պատասխանեց, թե դա հաղորդման հեղինակային առանձնահատկություններով է պայմանավորված, այն չի  օժանդակում ռուսերենի տարածմանը Հայաստանում: Իսկ լրագրողների դիտարկմանն էլ, թե այդ դեպքում «Ով է ուզում դառնալ միլիոնատեր» կամ այլ խաղերը ինչո՞ւ չեն հեռարձակվում հեղինակային լեզվով, Կարինե Հարությունյանը դարձյալ չկարողացավ պատասխանել: