Հայրիկյանն ուզում է ապացուցել, որ մենք ծախված և ստրկամիտ չենք

ԱԻՄ առաջնորդ Պարույր Հայրիկյանը մի քանի հոգու հետ ժամը 12-ին ՀՀ նախագահի նստավայրի առջեւ ՄՄ-ին անդամակցելու որոշման դեմ ցույց է սկսելու, որը տևելու է մինչև վիլնյուսյան գագաթաժողովը:

Լրագրողների հետ հանդիպման ժամանակ նա հայտնեց, որ նախագահի առջև դրվելու է «Վիլնյուս կամ հրաժարական» հարցը: «11 օր առաջ նախագահին ուղերձ էինք ուղարկել `պահանջելով հետ կանգնել ՄՄ-ին անդամակցելու մտադրությունից` նշելով, որ, հակառակ դեպքում, կնպաստի իր հրաժարականի կայացմանը»,- ասաց նա:

Ըստ Հայրիկյանի` եթե Սերժ Սարգսյանն անձամբ չգնա Վիլնյուս և չստորագրի ասոցացման համաձայնագիրը, մեզ բոլորիս կդնի անորոշ դրության մեջ:

Անդրադառնալով իր կողմից նոյեմբերի 29-ին կազմակերպվելիք հանրահավաքին` նա ասաց. «Հանրահավաքը նրանց համար է, ովքեր, որպես կանոն, լռում են, բայց իրենց հոգու խորքում կողմ են մեր տեսակետին: Այս հանրահավաքը ցույց կտա, որ մենք ծախված, ստրկամիտ պետություն չենք»: