Հայ սամբիստները վերադառնում են աշխարհի առաջնությունից

Այսօր՝  20:20-ին, Երևանի «Զվարթնոց» օդանավակայանում վայրէջք կկատարի սամբոյի Հայաստանի հավաքականի ինքնաթիռը:

Սանկտ Պետերբուրգում կայացած սամբոյի աշխարհի առաջնությունում հայ մարզիկները նվաճեցին 5 մեդալ: Պատվավոր երրորդ տեղն են գրավել Երջանիկ Կարապետյանը՝ 48 կգ, Սոսե Բալասանյանը` 52 կգ, Տիգրան Կիրակոսյանը՝ 52 կգ և Մավրիկ Նասիբյանը՝ 74 կգ: Իսկ 82 կգ քաշային կարգում հանդես եկող ստեփանակերտցի Աշոտ Դանիելյանը կրկնեց 2010թ. արդյունքը և, գերազանց անցկացնելով բոլոր գոտեմարտերը, ևս մեկ անգամ հռչակվեց աշխարհի չեմպիոն. տեղեկացնում է սամբոյի Հայաստանի ֆեդերացիան:

Հայաստանի հավաքականի օգտին հաշվարկային միավորներ բերեց նաև Բանակի կենտրոնական մարզական ակումբը ներկայացնող Արեն Անտոնյանը՝ 57 կգ քաշայինների մրցապայքարում գրավելով 5-րդ տեղը: 

Ինչպես yerkir.am-ին տեղեկացրեցին ՀՀ սպորտի և երիտասարդության հարցերի նախարարությունից, նախարարության ներկայացուցիչները հայ մարզասերների հետ միասին «Զվարթնոց» օդանավակայանում կդիմավորեն  մեդալակիրներին: