Բողոքող քաղաքացիները մտել են ''Արցախ բանկ'' (թարմացվում է)

Արդեն տեղեկացրել ենք, որ Երեւանի շուրջ 180 ընտանիքների ներկայացուցիչներ բողոքի ցույցի են դուրս եկել ընդդեմ «Արցախ բանկի»: Այս պահին նրանք մտել են բանկի` Սայաթ-Նովա փողոցում գտնվող մասնաճյուղը և վեճի բռնվել բանկի անվտանգության աշխատակիցների հետ: Վերջիններս փորձում են դուրս հանել բորբոքված քաղաքացիներին, սակայն մարդիկ դիմադրում են` պնդելով, որ «Արցախ բանկը» վերցրել է իրենց տները, իրենք էլ եկել են` այդտեղ ապրելու:

Արդեն բանկում են իրավապահները, բայց նրանց էլ չի հաջողվում դժգոհող քաղացաիներին դուրս հանել բանկից:

Մասնաճյուղի կառավարիչ Զոհրաբ Ավետիքյանն ասել է, որ պատրաստ է հավաքված մարդկանցից 1-2-ի հետ առանձին զրուցել, սակայն քաղաքացիները չեն համաձայնում` նշելով, որ իրենք արդեն ասելու բան չունեն, քանի որ բազմիցս նման զրույցներ եղել են, և ոչ մեկը արդյունք չի տվել, ուստի իրենք մնում են բանկում, խափանելու են բանկի բոլոր մասնաճյուղերի բնականոն աշխատանքը, ճիշտ այնպես, ինչպես բանկը վերցրել է իրենց տները:

Այնուամենայնիվ, քաղաքացիներից երկուսը համաձայնեցին զրուցել բանկի կառավարչի հետ: Զրույցից հետո քաղաքացի Էմմա Ղազարյանը նշեց, որ կոնկրետ բան իրենց չեն ասել, միայն խոստացել են, որ բարձրացրած հարցերը կներկայացնեն ղեկավարությանը: Իրենք էլ, իրենց հերթին, խոստացել են, որ այսօր կդադարեցնեն  ակցիան բանկում և այն կշարունակեն կառավարության մոտ:

Սակայն բողոքողների մի մասը ոչ մի կերպ չի ցանկանում դուրս գալ բանկի տարածքից: Այժմ որոշում են իրենց հետագա անելիքները:

Էմմա Ղազարյանը նշեց նաև, որ իրենց միակ հույսը Սերժ Սարգսյանն է, և եթե այս ակցիան արդյունք չտա, կգնան բողոքելու նախագահին նստավայրի մոտ: