Մենք նրանցից մեկն ենք. ՀՀԿ-ական պատգամավոր

ԱԺ ՀՀԿ խմբակցության պատգամավոր Կարինե Պողոսյանը ուրախ է, որ բարձրաստիճան պաշտոնյաների աշխատավարձերը բարձրացել են: Yerkir.am-ի հետ զրույցում նա նշեց, որ դրան վաղուց էր սպասում, որովհետև կարևորում է աշխատավարձերի բարձրացման հարցում միասնական ու համակարգված մոտեցումը: Պատգամավորի խոսքով` իր առաջին բարձրացված աշխատավարձը ծախսելու է «արդյունավետ, նպատակային, այսինքն` անձնական նպատակներով»:

Անդրադառնալով ՀՀԿ խմբակցության ղեկավար Գալուստ Սահակյանի դիտարկմանը, որ պատգամավորները կարող են բարձրացված աշխատավարձից օժանդակություն հատկացնել քաղաքացիներին, Կարինե Պողոսյանը նշեց, որ ինքը, լինելով մեծամասնականով ընտրված պատգամավոր, բարեգործություն միշտ էլ արել է: «Եթե մեզ դիմում են, եթե դրա կարիքը կա, անպայման օգնում ենք, էլ չենք սպասում աշխատավարձի բարձրացմանը»,- նշեց նա:

Հարցին` արդյո՞ք անհարմար չի զգացում, որ իր աշխատավարձը բարձրանում է երկրում առկա սոցիալական բարդ պայմաններում, Կարինե Պողոսյանը պատասխանեց. «Չէ, այդքան էլ չի նկատվում անհարմարության զգացում, որովհետև բոլոր քաղծառայողների աշխատավարձն է բարձրանում: Մենք էլ նրանցից մեկն ենք»: