Պետության իմիջի ձեւավորումը` ըստ ԲՀԿ-ի

ԱԺ ԲՀԿ խմբակցության քարտուղար Նաիրա Զոհրաբյանը եւ ԲՀԿ-ական պատգամավոր Վահե Հովհաննիսյանը մեկնաբանեցին նախօրեին ԱԺ-ում «Պետական աշխատողների աշխատավարձերի միասնական համակարգի մասին» օրենքի նախագծի քննարկումները: Նրանք նշեցին, որ ԲՀԿ-ն դեմ է քվեարկելու այդ օրինագծին:

«Պետք է նայել, թե ով է ներկայացնում այդ օրինագիծը և երբ: Այդ օրինագիծը ներկայացնում է մի կառավարություն, որը տապալել է երկրի տնտեսությունը, կիսասոված սոցիալական շերտեր, չքավորություն, արտագաղթ, ու այս պայմաններում գնալ քաղաքական էլիտայի աշխատավարձի բարձրացմանը, դա անթույլատրելի է»,- ասաց Վահե Հովհաննիսյանը:

Նրա խոսքով` պետության իմիջը ձևավորում են ոչ թե քաղաքական էլիտայի բարձր աշխատավարձերը, այլ Եվրոպայի ու Ռուսաստանի փողոցներում կիսասոված ՀՀ քաղաքացիները, դատարկվող քաղաքներն ու գյուղերը, այնպես որ` տպավորություն է ստեղծվում, որ իշխանական էլիտան կորցրել է իրականության զգացումը:

«Մենք չենք քվեարկի այս օրինագծի օգտին, որովհետև չենք կարողանա նայել քաղաքացիների աչքերի մեջ»,- ասաց Վահե Հովհաննիսյանը:

Նաիրա Զոհրաբյանի կարծիքով` գործազուրկներին նպաստից զրկելն ու էլիտայի աշխատավարձերը բարձրացնելն անթույլատրելի է: «Քաղաքացին մատնված է սովի, և սրա պատասխանատուներն իշխանություններն են»,- ասաց նա: