Սերժ Սարգսյանը նկատողություն է արել Գալուստ Սահակյանին

«Ժամանակ» թերթի տեղեկություններով` ՀՀԿ անցած շաբաթվա ԳՄ նիստի ժամանակ նախագահ Սերժ Սարգսյանը նկատողություն է արել ՀՀԿ խմբակցության ղեկավար Գալուստ Սահակյանին` «Օրինաց երկիր» կուսակցությանը վերաբերող հայտարարության համար:

Մաքսային միությանը անդամակցելու մասին Ս. Սարգսյանի հայտարարությունից հետո հարցադրումներ էին հնչում, թե Ս. Սարգսյանն իր հայտարարության մասին նախապես տեղյակ պահե՞լ է գոնե սեփական կուսակցությանը` ՀՀԿ-ին, կամ կոալիցիոն գործընկեր ՕԵԿ-ին: Գ. Սահակյանն, ըստ թերթի, իր հայտարարություններից մեկում նույնիսկ ասել էր, թե ՕԵԿ-ին տեղյակ պահելու կարիք էլ չկա:

Թերթի ՕԵԿ-ական աղբյուրների համաձայն՝ այդ կուսակցության նախագահ Արթուր Բաղդասարյանն անձամբ Սերժ Սարգսյանին տեղեկացրել է Գ. Սահակյանի հայտարարության մասին ու դժգոհել այդ կապակցությամբ:

«Գ. Սահակյանը նախապես հրաժարվել է իր արած հայտարարությունից, ինչից հետո Ս. Սարգսյանին է ներկայացվել նրա խոսքերի տպագիր տարբերակը: Գ. Սահակյանն այլևս չի կարողացել հրաժարվել իր խոսքերից: Եվ ահա նախագահն այդ առնչությամբ նկատողություն է արել Գ. Սահակյանին, թե՝ չի կարելի կոալիցիոն գործընկերոջ հասցեին վիրավորական ու արհամարհական հայտարարություններ անել»,- գրում է թերթը: