Դատարանը կոմպոզիտորների պահանջը կքննի հոկտեմբերի 31-ին

Արդեն տեղեկացրել ենք, որ Հայաստանի կոմպոզիտորների եւ երաժշտագետների միության 5 անդամ դիմել է դատարան, որպեսզի պարտավորեցնեն միության նախագահ Ռոբերտ Ամիրխանյանին` օրենքով սահմանված ժամկետում անցկացնել արտահերթ համագումար:

Yerkir.am-ի հետ զրույցում կոմպոզիտոր Լեւոն Չաուշյանը նշեց, որ դատական նիստի օրը որոշվել է. կոմպոզիտորների պահանջը կքննվի հոկտեմբերի 31-ին. «Սա աբսուրդ է, ինչո՞ւ են այդքան ուշ նշանակել դատական նիստը»:

Մինչ այդ միության նախագահ Ռոբերտ Ամիրխանյանը հայտարարել էր, որ հոկտեմբերի 26-ին լինելու է հերթական համագումարը:

Չաուշյանը նշեց, որ համագումարին իրենք պատրաստվում են ինչպես հարկն է եւ անպայման առաջ են քաշելու միության նախագահին փոխելու առաջարկ: «Չի բացառվում, որ համագումարը ներկայացման կվերածվի»,- հավելեց նա: