Կարկուտից տուժած արմավիրցիներին աշնանը եւս կօժանդակեն

Արմավիրի մարզի կարկտահարության հետևանքով տուժած գյուղացիական տնտեսությունների վերականգնման ծրագրերի իրականացման նպատակով Հայաստանի Հանրապետության կառավարության պահուստային ֆոնդից Հայաստանի Հանրապետության աշխատանքի և սոցիալական հարցերի նախարարությանը 2013 թվականի 3-րդ եռամսյակում հատկացրել էր 171 միլիոն 500 հազ. դրամ: 2013 թվականի օգոստոսի 9-ի դրությամբ ծրագրում ընդգրկված 500 հողօգտագործողներից 478-ի հետ կնքվել է գյուղացիական տնտեսության վերականգնման պայմանագիր 105 միլիոն 901 հազար 280 դրամ գումարով: Շահառուները, ինչպես ներկայացնում է ծրագիրն իրականացնող աշխատանքի ե սոցիալական հարցերի նախարար Արտեմ Ասատրյանը, օգտվելով ՀՀ կառավարության օժանդակությունից, մի կողմից հնարավորություն ստացան վերականգնել իրենց գյուղացիական տնտեսությունները, մյուս կողմից` ապահովվեց նրանց ժամանակավոր զբաղվածությունը:

Ծրագրի իրականացումից հետ, ինչպես երեւում է ծախսված միջոցների չափից, առաջացել են չօգտագործված միջոցներ, ուստի կառավարությունն իր այսօրվա նիստում պահուստային ֆոնդից հատկացված ֆինանսական միջոցներն ամբողջությամբ օգտագործելու և ավելի մեծ թվով շահառուների աջակցելու նպատակով որոշեց կառավարության կողմից ծրագրին հատկացված գումարների չօգտագործված մասն ուղղել նոր ծրագրերի իրականացմանը:

«Մենք ծրագիր իրականացրեցինք մոտ 500 հողօգտագործողների համար: Այդ ծրագրերը բավականին արդյունավետ իրականացվել են, ու քանի որ հիմա կան չօգտագործված միջոցներ, առաջարկում ենք եւս մի քանի լրացուցիչ ծրագրեր իրականացնել այս աշնան ժամանակահատվածում»,- որոշման նախագիծը ներկայացնելիս ասաց ՀՀ աշխատանքի եւ սոցիալական հարցերի նախարար Արտեմ Ասատրյանը:

Վարչապետը հետաքրքրվեց, թե Արմավիրի մարզում կարկուտից հետո իրականացված օժանդակության ծրագրերի նկատմամբ ժողովրդի վերաբերմունքն ինչպիսի՞ն է: Արտեմ Ասատրյանը պատասխանեց, որ կոնկրետ այս ծրագրի մասով կառավարության որոշմամբ սահմանվեցին առաջնահերթությունները, եւ բացի նրանից, որ 50 հազարական դրամ օգնությունը հատկացվեց, նաեւ զբաղվածության որոշակի ծրագրեր իրականացվեցին` հողօգտագործողներն իրենց հողատարածքներում հողի մշակման հետ կապված լրացուցիչ աշխատուժ ներգրավեցին:

«Այդ ժամանակահատվածում լրացուցիչ ժամանակավոր զբաղվածություն ապահովվեց` օրական 4000 դրամի չափով եկամուտ վճարվեց աշխատակիցներին, եւ բավականին հաջողված ծրագրեր էին»,- պատասխանեց Արտեմ Ասատրյանը:

Տիգրան Սարգսյանը նշեց, թե դա նախարարի գնահատականն է, իսկ ժողովրդի գնահատականն ինչպիսի՞ն է: Արտեմ Ասատրյանը նշեց, որ համապատասխան ուսումնասիրություններ կան, որոնք ցույց են տալիս, որ ազգաբնակչության շրջանում եւս ծրագրերը դրական են գնահատվել: