Պռոշյանի գյուղապետի սպանության մեղադրանքով կալանավորված Պետրոսյանին կպաշտպանի նրա ընկերը

Պռոշյանի գյուղապետ Հրաչ Մուրադյանի սպանության մեջ մեղադրվող Արայիկ Պետրոսյանի շահերն այսուհետ կպաշտպանի նաև ՀՀ փաստաբանների պալատի անդամ Նորայր Նորիկյանը: Նա կալանավորված Պոտրոսյանի ընկերն է:

Yerkir.am-ի հետ զրույցում Պետրոսյանի առաջին պաշտպան Գիվի Հովհաննիսյանը նշեց, որ ինքը ծանրաբեռնված է, այդ իսկ պատճառով համաձայնել է, որ Արայիկի պաշտպանությամբ Նորիկյանն էլ զբաղվի: Սակայն, ըստ նրա, գործում երկրորդ պաշտպանի ներգրավումը որևէ էական նշանակություն չի ունենա: «Ես ի՞նչ կարողացա անել, որ նա էլ անի»,- ասաց նա և հավելեց, որ ի սկզբանե պարզ էր, որ նախաքննությունն ընթանում է անօրինական ձևով:

Երեկ նոր պաշտպանը բաց նամակ էր ուղղել ՀՀ գլխավոր դատախազ Գևորգ Կոստանյանին` խնդրելով իր պաշտպանյալի նկատմամբ քրեական հետապնդումը դադարեցնել, օբյեկտիվ և արդար նախաքննություն իրականացնել: Պաշտպանական կողմը, միաժամանակ, առաջարկել էր դատախազին` հանդիպել և քրեական գործի վերաբերյալ բոլոր մտահոգությունները ներկայացնել անձամբ նրան:

Հիշեցնենք, որ Ա.Պետրոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 2-րդ կետով և 235-րդ հոդվածի 1-ին մասով:

Ի դեպ, այսօր Կենտրոն և Նորք-Մարաշ վարչական շրջանների դատարանը կքննի նախաքննական մարմնի միջնորդությունը` Արայիկ Պետրոսյանի նկատմամբ ընտրված խափանման միջոց կալանքը ևս 2 ամսով երկարաձգելու մասին: