Մեկը մյուսին պաս տալով` գործ են քննում. Պռոշյանի գյուղապետի սպանության գործով փաստաբան

Պռոշյանի գյուղապետ Հրաչ Մուրադյանի սպանության մեջ մեղադրվող Արայիկ Պետրոսյանի փաստաբան Գիվի Հովհաննիսյանը անհիմն է համարում իր պաշտպանյալի նկատմամբ ընտրված խափանման միջոց կալանքը եւս երկու ամսով երկարաձգելու` դատարանի որոշումը: Փաստաբանը, թեև բողոքարկել է որոշումը, սակայն համոզված է, որ Վերաքննիչ դատարանն անփոփոխ կթողնի այն:

Այսօր Փաստաբանների պալատում Գ. Հովհաննիսյանը մտահոգություն հայտնեց,  որ լռելու դեպքում հնարավոր է` ապօրինություններով լի գործն այդպես էլ ուղարկեն դատարան: Ըստ  նրա`  ողջ մեղադրանքը հիմնված է  Արայիկ Պետրոսյանի հագուստի և դեմքի վրայից անտիմոնի հայտնաբերման վրա:

«Անտիմոնը հանդիպում է բնության մեջ, և' կենցաղում, և' ցանկացած բանից կարող էր առաջանալ»,- ասաց փաստաբանը և հավելեց, որ մեղադրական եզրակացության մեջ անգամ նշված չէ անտիմոնի վաղեմության ժամկետը և հիմնավորված չէ, որ այն կրակոցի հետևանքով է առաջացել:

Մեղադրանքի համար հիմք է հանդիսացել նաև այն հանգամանքը, որ Արայիկ Պետրոսյանը «Նիվա» մակնիշի մեքենա ունի, իսկ ականատեսների վկայությամբ` գյուղապետի վրա կրակել են հենց այդ մակնիշի մեքենայից:

«Եթե ընդունենք այն, որ սպանություն կատարող անձնավորությունը եղել է «Նիվա» մակնիշի մեքենայով, ապա ստացվում է, որ սպանությունը կատարվել է մի անձի կողմից, ով համոզված է եղել, որ եթե իրեն տեսեն, ապա չեն ճանաչի:  Չեն ճանաչի նաև ավտոմեքենան, իսկ մեքենայի պետհամարանիշը հիշելու դեպքում` չեն կարող այն գտնել,  քանի որ այն կեղծված է եղել և նման համար գոյություն չունի»,- հայտարարեց փաստաբանը:

Հովհաննիսյանը  հայտնեց նաև, որ երկու ամսվա ընթացքում իր պաշտպանյալի նկատմամբ որևէ քննչական գործողություն չի կատարվել, վարույթն իրականացնող մարմինը մինչ օրս առերեսում չի իրականացրել: Գործի շրջանակներում շուրջ 150 հոգի հարցաքննվել է, սակայն  փաստաբանը նշում է, որ այդ հարցաքննություններն անիմաստ են անցել, քանի որ մինչ օրս հանցագործությունը չի բացահայտվել, եւ մեղադրանքը չի հիմնավորվել:

«Կատարվում է մի պատվեր, որի շրջանակներում, մեկը մյուսին պաս տալով, գործ են քննում` չմտածելով, որ խաղում են մարդու ճակատագրի հետ»,- ասաց փաստաբանը:

Հիշեցնենք, որ Պռոշյանի գյուղապետ Հրաչ Մուրադյանը սպանվել է ապրիլի 2-ի առավոտյան` Պռոշյան գյուղում: