Վարչապետը հիմա կողմ է. Գալուստ Սահակյանի խոստովանությունը

Արդեն տեղեկացրել ենք, որ ՀՀԿ ԳՄ նիստից առաջ վարչապետ Տիգրան Սարգսյանը, ի պատասխան մեր թղթակցի հարցի, հստակ հայտարարել է, որ չի փոխել Մաքսային միության վերաբերյալ իր դիրքորոշումը: Իսկ, ինչպես հայտնի է, Տիգրան Սարգսյանը մեկ անգամ չէ, որ դեմ է արտահայտվել այդ միությանը:

Այսօր ՀՀԿ ԳՄ նիստից հետո, Yerkir.am-ի թղթակցի խնդրանքով անդրադառնալով Տիգրան Սարգսյանի այս հայտարարությանը, ՀՀԿ փոխնախագահ Գալուստ Սահակյանը նախ նշեց, թե չի կարծում, որ «Տիգրան Սարգսյանն ընդգծված դիրքորոշում ունի», հետո վստահեցրեց, որ «վարչապետը հիմա կողմ է Մաքսային միությանը»:

Ստացվում է` Գալուստ Սահակյանը, «հիմա» բառը շեշտելով, խոստովանում է, որ նախքան Մոսկվայում Սերժ Սարգսյանի հայտարարությունը վարչապետն, իրոք, դեմ էր Մաքսային միությանը, Սերժ Սարգսյանի հայտարարությունից հետո, ուզած-չուզած, կողմ է այդ միությանն անդամակցելուն: