Քաղաքապետարանը 2010-2013թթ. քառամյա ծրագիրը չի իրականացնում

Ավագանու «Բարև Երևան» խմբակցության ղեկավար Անահիտ Բախշյանը Երևանի մանկապարտեզներում հերթագրված երեխաների վերաբերյալ երեկ նամակ է ուղարկել քաղաքապետ Տարոն Մարգարյանին, որում ասվում է.

«Իմ հարցմանն ի պատասխան ստացել եմ Երևանի մանկապարտեզներում հերթագրված երեխաների թվի մասին տեղեկություն (կատարողներ՝ Հանրակրթության, Իրավաբանական և Կազմակերպական վարչություններ), ըստ որի՝ Երևանի մանկապարտեզներում հերթագրված երեխաների թիվը 20080 է: Եթե անգամ ընդունենք, որ նրանց 30 տոկոսը կրկնակի հերթագրվածներ են, ապա մոտ 15000 հերթագրված երեխա կա Երևանում, որոնց առնվազն 1/3-ը 5 տարեկանները կլինեն, այսինքն՝ 5 տարեկան մոտ 5000 երեխա այսօր դուրս է մնում կրթությունից:

Հիշեցնեմ, որ «Կրթության զարգացման պետական ծրագրիր» ՀՀ օրենքով նախատեսված է, որ մինչև 2015 թվականը 5 տարեկանների 90 տոկոսը պետք հաճախի նախադպրոցական ուսումնական հաստատություններ: Երևանի զարգացման 2010-2013թթ. ծրագրում էլ գրված է՝ նախադպրոցական ավագ տարիքային խմբի երեխաներին պետք է պարտադիր ընդգրկել նախադպրոցական կրթության համակարգ, սակայն ոչ մի կետով  չի նախատեսվում նախադպրոցական ուսումնական հաստատությունների թիվն  ավելացնել կամ չի խոսվում այն ծրագրի մասին, որով դպրոցներում կիրականացվի այս ծրագիրը: Առիթը եկել է ասելու, որ այդ ծրագրով նախատեսվել է հիմնանորոգել 16 մանկապարտեզ և նորոգել 4 մանկապարտեզների տանիքն ու սանհանգույցները: Մասնավորապես, 2011 թվականին ծրագրված է եղել հիմնանորոգել Երևանի Կենտրոնի հ.1 մանկապարտեզն ու կաթսայատուն կառուցել մանկապարտեզի համար, սակայն առ այսօր՝ 2013 թվականի սեպտեմբերը, մանկապարտեզի դռները դեռևս փակ են, քաղաքապետարանը կամ Կենտրոնի վարչական շրջանի ղեկավարը այդպես էլ չեն պատասխանում իմ գրավոր այն հարցմանը, որով խնդրել եմ տրամադրել այդ մանկապարտեզի գործունեությունը դադարեցնելու մասին որոշումը և ներսը տեսնելու թույլտվությունը:

Կրկին խնդրում եմ տրամադրել թ.1 մանկապարտեզի գործունեությունը կասեցնելու որոշումն ու կազմակերպել այցելություն այդ մանկապարտեզի ներսն ուսումնասիրելու նպատակով, ինչպես նաև ներկայացնել քաղաքապետարանի այն միջոցառումների պլանը, որը միտված է լինելու նախադպրոցական կրթության «ՀՀ կրթության զարգացման պետական ծրագիր» ՀՀ օրենքի պահանջն իրականացնելուն:

Շնորհակալություն համագործակցության համար»: