Պուտինի այցելությունը Բաքու հետաքրքիր նպատակ էր հետապնդում

«Ադրբեջանի ընտրությունների նախօրեին նրա այցը օժանդակության միջոց էր Ալիևին և Ադրբեջանում  այն վերածվեց լավ ինքնափիառի»,- այսօր, լրագրողների հետ հանդիպման ժամանակ, ասաց ադրբեջանագետ Սարգիս Ասատրյանը:

Նրա ներկայացմամբ` արդեն իսկ տարբեր մասնագետներ սկսել են հայտարարություններ անել,թե Ալիևը այնքան լավն է,որ Ռուսաստանի Դաշնության նախագահը սատարում է նրան ընտրություններից առաջ: Ադրբեջանագետը նշեց, սակայն, որ Ռուսաստանը իր շահերն ունի տարածաշրջանում:

«Մենք բոլորս էլ գիտենք, որ Ռուսաստանը հետապնդում է իր շահերը տարածաշրջանում և Ադրբեջանը այս առումով կարևոր առանցքային պետություն է: Առանցքային է այն առումով, որ խոշոր  էներգակիրների մատակարարն է և   նավթագազային ոլորտում տարածաշրջանում վերածվում է շուրջ խաղացողի:  Եվ Պուտինը փորձեց ամենինչ անել, որպեսզի հնարավորինս մեծ բաժնեմաս  կորզի Ադրբեջանի նավթային ընկերությունից»,- նշեց ադրբեջանագետը:

Ս. Ասատրյանի խոսքերով` շատ մասնագետներ հակված են նաև մտածելու, որ Պուտինը փորձում էր Բաքվին ներքաշել Եվրասիական միության մեջ: Ադրբեջանագետն ասաց, որ չնայած արտնաքնապես լավ հարաբերությունների` կան շատ հարցեր երկու երկրների միջեւ. Բաքուն դժվար թե ցանկանա եվրասիական միությանը հարել, քանի որ լուրջ պրոյեկտներ ունի Արևմուտքի հետ:  Հարց է նաեւ, թե Ադրբեջանը հաշվի կառնի՞  արդյոք Ռուսաստանի տարածաշրջանի շահերը:

Սակայն մյուս կողմից, նշեց Ս. Ասատրյանը, այսօր Ադրբեջանի և Ռուսաստանի միջև ռազմական համագործակցությունը հասնում է միլիարդավոր դոլարների: